محصل د یوه هېواد د لوړو زده کړو نظام مرکزي محور دی!
دا خبره د لوړو زده کړو سرپرست وزیر محترم شیخ الحدیث مولوي نداء محمد ندیم د آنلاین ناستې په ترڅ کې، چې د دغه وزارت مرکزي ادارو یو شمېر رئيسانو او مرکزي تحصيلي بنسټونو مسؤلين یې برخه وال وو، د امارتي تحصيلي بنسټونو مشرتابه پلاوي ته وکړه.
د لوړو زده کړو سرپرست د هېواد تحصيلي بنسټونو ته د ا.ا.ا مشرتابه د ځانګړې پاملرنې او همدا راز د امارتي تحصيلي بنسټونو مسؤلينو د فعالیتونو او لاسته راوړنو ستاینه وکړه، محصلان یې د ا.ا.ا او په ځانګړي ډول د تحصيلي نظام محوري نقطه یاده کړه او زیاته یې کړه، چې موږ او تاسو هر یو د دوی د درسي نصاب، صنفي حاضرۍ، اعاشې، اباطی او لیلیې په اړه مسؤليت لرو، هڅه باید وکړو چې د هېواد، اسلامي نظام او ټولنې راتلونکي نسل پر وړاندې خپل مسؤليت په ښه ډول ترسره کړو، څو راتلونکي کې په اسلامي او ملي ارزښتونو ژمن او واقعي خدمتګاران ټولنې ته وړاندې کړو.
ورپسې د یو شمېر تحصیلي بنسټونو د ځینو محصلینو د ۱۴۰۳ هـ ش کال د خزاني سمستر د حاضرۍ د احصايې راپور او همداراز د دغه وزارت اړوند د یو شمېر تحصيلي بنسټونو لیلیو او تدریسي روغتونونو شته ستونزو راپور د اکاډمیکو چارو د څارنې او ارزونې رئيس مولوي احمدالله حماد او د دې وزارت د دفتر رئيس قاري محمد سلیمان شریفي له لوري ګډونوالو ته وړاندې شو.
ورپسې د لوړو زده کړو وزارت د علمي برنامو پراختیا رئيس انجنیر سردار ولي صالحي او د کابل پولي تخنیک پوهنتون سرپرست له لوري په تحصيلي بنسټونو کې د درسي چارو د ښه والي په اړه تیار کړی پرېزنټیشن وړاندې کړ.
په پای کې د ګډونوالو په استازیتوب د ځینو تحصیلي بنسټونو رئیسانو خبرې وکړي او په تحصیلي بنسټونو کې د شته ستونزو په روښانه کولو او حل کولو کې د دغه وزارت له رهبري پلاوي څخه مننه وکړه.
