سيد جمال الدين افغاني پوهنتون کې د کرونا واکسین د تطبیق پروسه پیل شوه
په مراسمو کې يې د پوهنتون علمي چارو مرستيال پوهنمل ميرويس ستانکزي، محصلانو چارو مرستيال پوهنمل احمد الله عزيز، مالي او اداري چارو مرستيال عبد الوهاب عزيز او د عامې روغتيا رياست مسولينو برخه لرله.
د پوهنتون علمي چارو مرستیال د یادې پروسې د پرانیستې پر مهال وویل:"د دې کمپاین په ترڅ کې به د کونړ د عامې روغتیا ریاست په همکارۍ د پوهنتون هغو استادانو، محصلینو، اداري او خدماتي کارکوونکو ته چې تر اوسه واکسین شوي نه دي، یاد واکسین تطبیق شي."
هغه زياته کړه که څه هم پوهنتون کې یو ځل وړاندې د کرونا واکسینو د تطبیق پروسه پلې شوې وه او ځېنې استادان او منسوبین واکسین شوي وو؛ خو دا ځل یاده چاره د لوړو زده کړو وزارت د مشرتابه شورا له پرېکړې سره سم الزامي بڼه لري او د پوهنتونونو د پیلېدا د یوه شرط په توګه به پاتې ټول استادان، محصلین، اداري او خدماتي کارکوونکي واکسین شي.
کونړ د عامې روغتيا رياست استازي ډاکټر محمد اسحاق په خپلو خبرو کې د لیرې پرتو سیمو له محصلینو وغوښتل چې د ولسوالۍ په کچه روغتیايي مرکزونو ته د واکسینو د تطبیق په موخه ورشي او خپل ځان او نور له دغې وژونکې ناروغۍ څخه وژغوري.
