د لوړو زده کړو وزارت مالي او اداري معین د نشراتو، اطلاعاتو او عامه اړیکو ریاست له رئیس او کارمندانو سره وکتل
د لوړو زده کړو وزارت مالي او اداري معین په یوه ناسته کې د نشراتو، اطلاعاتو او عامه اړیکو له رئیس او کارمندانو سره د دغه وزارت د نشراتي چارو پر ښه والي ټینګار وکړ.
د لوړو زده کړو وزارت مالي او اداري معین نوراحمد درویش د یاد ریاست د غړو د غوښتنو، طرحو، نظرونو او وړاندېزونو د اوریدو په ترڅ کې، هغوی ته لارښوونه وکړه چې په همغږۍ او ښه انسجام سره، د نشراتي سرعت د ښه والي، د اداري اصولو مراعتولو او د اطلاع رسونې د ښو خدمتونو وړاندې کولو په برخو کې جدي توجه وکړي.
د لوړو زده کړو وزارت مالي او اداري معین وویل چې ددې وزارت د نشراتو، اطلاعاتو او عامه اړیکو ریاست د تشکیل په بیا کتنه کار جریان لري او په نژدې وخت کې به بنسټیز بدلونونه رامنځته شي.
هغه زیاته کړه چې د لوړو زده کړو وزارت د کارمندانو د مسلکي وړتیا لوړول، د موجوده ادارې سیسټم اصلاح کول او د الیکټرونیکي حکومتولۍ تطبیقول ددې وزارت د مالي او اداري معینیت له کاري لومړیتوبونو څخه دي.
دغه راز د لوړو زده کړو وزارت د نشراتو، اطلاعاتو او عامه اړیکو رئیس عزیزاحمد اوریاخیل د یاد ریاست د اصلاحي طرحو او پروګرامونو په اړوند خبرې وکړې او ویې ویل، چې د نشراتو ریاست د کاري چارو د لا ښه والي په خاطر به نور هم له جدیت څخه کار واخلي.