د لوړو زده کړو علمي معين: ارواښاد ګل حسن وليزی يو دينداره، متواضع او صادق انسان و
د لوړو زده کړو وزارت پخواني مالي او اداري مرستیال او د خوست شیخ زاید پوهنتون پخواني رییس ډاکټر ګل حسن ولیزي جنازه نن له جرمني څخه کابل او تر هغه وروسته خوست ولایت واستول شوه.
د کابل هوايی ډګر ته د ارواښاد د جنازې رسېدو سره سم؛ په داسې حال کې چې د خوست شیخ زاید پوهنتون رییس، یوشمېر استادانو او د مرحوم خپلوانو هم حضور لاره، د لوړو زده کړو وزارت علمي مرستیال پوهنمل عبدالتواب بالاکرزي د مرحوم روح ته دعا وکړه او ډاکټر ګل حسن ولیزی یې هغه شخصیت وباله چې د ژوند په اوږدو کې یې د هیواد لوړو زده کړو او د ځوانانو د زده کړو په برخه کې نه هېرېدونکې هڅې کړې وې.
د لوړو زده کړو وزارت علمي مرستیال وویل چې ارواښاد ګل حسن ولیزی نه یوازې یو علمي کادر و بلکې یو بادیانته، متواضع او صادقه انسان و او د نوموړي مړینه د لوړو زده کړو کورنۍ لپاره یوه ستره ضایعه ده.
د خوست پوهنتون رییس پوهنمل حسین ګل آریوبي هم د مرحوم د شخصیت په اړه خبرې وکړې او د خوست شیخ زاید پوهنتون لپاره یې د نوموړي هڅې او کارونه په نیکۍ یاد کړل.
پوهنوال ډاکټر ګل حسن ولیزي د ۶۹ کلونو په عمر د ورپېښې ناروغۍ له امله له دې نړۍ څخه سترګې پټې کړې. ټاکل شوې ارواښاد ولیزی خوست ولایت کې په خپله پلرنۍ هدیره کې خاورو ته وسپارل شي.
انالله و انا الیه راجعون