د لوړو زده کړو وزارت د معلوماتي سیسټم (HEMIS) کمېسیون درېیمه ناسته جوړ شوه

لوړو زده کړو وزارت د معلوماتي سیسټم (HEMIS) کمېسیون درېیمه ناسته د لوړو زده کړو وزارت مالي او اداري معین نور احمد دروېش په مشرۍ تر سره کړه. په یاده ناسته کې د احصایې او معلوماتو ملي ادارې استازي او د لوړو زده کړو وزارت مرکزي ادارو ځینو مشرانو ګډون کړی وو.

د ناستې په پیل کې ټاکل شویو کمېټو د هغو مادیولونو په اړه پرېزنټېشن وړاندې کړ چې د دغه وزارت د درېیو معینیتونو کاري لومړیتوبونه ول او همدارنګه د کاري میکانیزمونو په اړه یې د کمېسیون غړو ته معلومات ورکړل.

د لوړو زده کړو وزارت مالي او اداري معین نور احمد دروېش وویل؛ د لوړو زده کړو وزارت ژمن دی چې د احصایې او معلوماتو ملي ادارې په همکارۍ د دغه وزارت د اداري سیسټم ساده کولو او مراجعینو ته د ښو خدمتونو وړاندې کولو لپاره، د ۱۴۰۰ کال تر پایه د HEMIS سیسټم تول مادیولونه بشپړ او پلي کړي.

د ناستې غړو د یادو پرېزنټېشنونو، چې د دغه وزارت د مرکزي ادارو د ریاستونو ۹ مادیولونه پکې شامل دي، له اورېدو وروسته د تخنیکي توکو، د سیستمونو د ښه مخته وړولو لپاره د کارکوونکو وړتیا لوړولو او نورو مسایلو په اړه خبرې وکړې او خپل نظریات یې له یوبل سره شریک کړل.

په ناسته کې پرېکړه وشوه چې د یادو مادیولونو تخنیکي معلومات به د احصایې له ملي ادارې سره شریک شي. دغه راز د ناستې غړو د څېړنې او دولتي چارو محصلینو ریاست، تالیف او ترجمعه ریاست د مادیولونو په اړه چې پخوا کار ورباندې شوی و، د نظریاتو له وړاندې کولو وروسته پرېکړه وکړه چې د غني کېدو او ستونزو د له منځه وړلو په پار به ډېر کار ورباندې وشي.

د لوړو زده کړو وزارت د معلوماتو سیستم (HEMIS) لاندې دری کمېټې لري؛ د محصلانو چارې، اکاډمیکې چارې، مالي او اداری چارې، چې ۱۳ غړي لري او په سر کې یې د لوړو زده کړو وزارت مالي او اداري معین دی.