ننګرهار پوهنتون طب پوهنځي کې د تصفیه شویو اوبو سیستم فعالیږي او ترڅنګ یې د یاد پوهنتنون مرکزي کمپس د پاکۍ او تنظیفاتو چارې پیل شوې.
د ننګرهار پوهنتون رئیس پوهاند خلیل احمد بهسودوال د یاد پوهنتون د محصلانو چارو مرستیال په ملتیا د ننګرهار پوهنتون طب پوهنځي کې د تصفیه شویو اوبو سیستم د جوړېدو له چارو لیدنه وکړه، چې د یونسیف ادارې په مالي او د COAR مؤسسې په تخنیکي مرسته جوړېږي او په یوه ساعت کې به د ۲۰۰۰ لیترو اوبو د تصفیه کولو وړتیا ولري.
د ننګرهار پوهنتون رئیس د یونسیف او COAR ادارو مننه وکړه، چې په یاده برخه کې یې د پوهنتون لاسنیوی وکړ او دغه راز یې د طب پوهنځي د مشرتابه هم مننه وکړه، چې په هلو ځلو یې نوموړی سیستم فعالېږي.
بل لور ته د ننګرهار پوهنتون د مرکزي کمپس لارو، ویالو، ګلدانونو او چمنونو د پاکۍ چارې د جلال آباد ښاروالۍ او د دې پوهنتون د ساتنې او څارنې مدیریت کارکوونکو په مرسته پیل شوې، چې پرانیسته یې د لیندۍ په ۲۸مه نېټه ننګرهار پوهنتون د چاپېریال ساتنې کمېټې د مشر پوهنوال سید اکرم هاشمي او د جلال آباد ښاروالۍ د اوومې ناحیې د تنظیف او سرسبزۍ د مدیر محمد یوسف هاشمي له خوا وشوه.
پوهنوال هاشمي د جلال اباد ښاروالۍ د مشرتابه او مسؤلینو د مننې ترڅنګ کاریګرو ته سپارښتنه وکړه، چې ورسپارل شوی کار په پوره اخلاص او امانتدارۍ سره سرته ورسوي.
