د لوړو زده کړو سرپرست په خپل کاري دفتر کې افغانستان لپاره د اسلامي همکاریو سازمان له ځانګړي استازي سره وکتل
د لوړو زده کړو سرپرست وزیر محترم شیخ الحدیث مولوي نداء محمد ندیم د افغانستان لپاره د اسلامي همکاریو سازمان له ځانګړي استازي طارق علي بخیط او مل پلاوي سره وکتل.
په پیل کې محترم شیخ صاحب ښاغلي طارق علي بخیط ته د ښه راغلاست ویلو ترڅنک خوښي څرګنده کړه چې نوموړی افغانستان ته راغلی، د افغانستان وضعیت له نیږدې ګوري او د دې هېواد اصلي انځور نړۍ ته وړاندې کوي.
هغه تر فتحې وروسته د هېواد د تحصیلي نظام لاسته راوړنو ته په اشارې وویل، چې تحصیلي نصاب مخکې د افغانانو اړتیاوو ته ځواب ویونکی نه وو چې د اسلامي او ملي ارزښتونو په پام کې نیولو سره پرې بیا کتنه وشوه، همدارنګه په تحصیلي نهادونو کې د زیربنایي پروژو، د نویو پوهنځیو او څانګو د ایجاد، په تحصیلي نهادونو کې د ماسټري او دوکتورا برنامو ایجاد، استادانو لپاره د ماسټري او دوکتورا دورې د فیس معاف کول، د مسافرو استادانو لپاره د اعاشې او اباطې برابرول، په تحصیلي نهادونو کې د کادري بشري قوې تشې ډکولو او نورو لاسته راوړنو ته اشاره وکړه او ویې ویل، چې الحمدلله د ا.ا له حاکمیت وروسته په هېواد کې، د دیني او عصري علومو ترمنځ واټن له منځه تللی او دا نظام دواړو سکتورونو ته ځانګړې پاملرنه کوي.
وروسته د افغانستان لپاره د اسلامي همکاریو سازمان ځانګړي استازي، محترم طارق علي بخیط، د لوړو زده کړو وزارت د معلوماتو او لاسته راوړنو په اړه چې د دې وزارت سرپرست وزیر لخوا شریک شول، خوښي وښوده او ویې ویل چې دا سازمان د ۵۷ اسلامي هېوادونو په استازیتوب فعالیت کوي.
نوموړي د ا.ا.ا او په ځانګړې توګه د لوړو زده کړو وزارت سره په اقتصادي، علمي او تحصیلي برخو کې د همکاریو ژمنه وکړه او زیاته یې کړه، چې په افغانستان کې سرتاسري امنیت حاکم شوی او په ټولو برخو کې د پرمختګ لپاره زمینه برابره شوې ده.
نېټه: سه شنبه
۱۴۴۶ هـ.ق د شعبان المعظم ۱۹ مه
۱۴۰۳ هـ.ش د سلواغې ۳۰ مه
۲۰۲۵ م د فبروري ۱۸ مه
