د ا.ا.ا او په ځانګړي ډول لوړو زده کړو وزارت به د علمي، څېړنیزو او تدریسي خدمتونو د کیفیت لوړولو په برخه کې، هر هغه څه چې په واک کې لري، ونه سپموي
دغه څرګندونې د لوړو زده کړو سرپرست وزیر شیخ الحدیث مولوي نداء محمد ندیم، د میرویس خان نیکه زابل لوړو زده کړو مؤسسې له مشرتابه پلاوي، د علمي شورا غړو، د شرعیاتو پوهنځي له استادانو او محصلینو سره په جلا جلا ناستو کې وکړې.
د لوړو زده کړو سرپرست وزیر زیاته کړه، چې د ا.ا.ا مشرتابه د هېواد د تحصیلي نظام ځواکمنتیا او پراختیا ته ژمن دی او له خپلې وسې سره سم به د تحصیلي سکټور په پیاوړتیا کې هېڅ هم ونه سپموي.
نوموړي د ياد تحصیلي بنسټ د مشرتابه پلاوي د ځينو وړانديزونو د منظورۍ تر څنګ وويل، چې د هېواد د تحصيلي بنسټونو مسؤلين او استادان باید په پوره جديت او اخلاص سره د علمي، تدريسي او زېربنايي کيفيت لوړولو په برخه کې خپلې هڅې وکړي.
همدارنګه د لوړو زده کړو سرپرست وزیر د میرویس خان نیکه زابل لوړو زده کړو مؤسسې د شرعیاتو پوهنځي له استادانو سره په کتنه کې له هغوی وغوښتل چې خپل محصلین د دیني او ملي ارزښتونو په روحیه سمبال وروزي او د هغوی ذهني روښانتیا ته ځانګړې پاملرنه وکړي.
د لوړو زده کړو سرپرست وزیر شیخ الحدیث مولوي نداء محمد ندیم د میرویس خان نیکه زابل لوړو زده کړو مؤسسې محصلینو سره په لیدنه کې د هغوی غوښتنې او ستونزې واورېدې او د غوښتنو د پوره کېدو او ستونزو د حل ډاډ یې ورکړ.
د يادونې وړ ده، چې میرویس خان نیکه زابل لوړو زده کړو مؤسسه په ۱۳۹۶هـ.ش کال کې ایجاد شوې، چې اوسمهال ۴ پوهنځي، ۱۰ ډيپارټمنټونه، ۷۷ استادان او ۸۵۵ محصلين لري.
نېټه: چهارشنبه
۱۴۴۶ هـ ق، د جمادی الاول ۱۸مه
۱۴۰۳ هـ ش د عقرب ۳۰ مه
۲۰۲۴م د نوامبر ۲۰مه
