د "اداري فعالیتونو ډیجيټل کول او د انټرنټ او ټولنیزو شبکو د مدیریت څرنګوالی" روزنیز ورکشاپ جوړ شو
د بدخشان پوهنتون کارکوونکو لپاره "د اداري فعالیتونو ډیجیټل کول او د انټرنیټ او ټولنیزو شبکو مدیریت څرنګوالي" تر سرلیک لاندې درې ورځنی روزنیز ورکشاپ جوړ شو.
د بدخشان پوهنتون عمومي رئیس پوهندوی محمد قاسم آریا په اوسني وخت کې د حکومتي ادارو الکترونیکي کول مهمه اړتیا وبلله او ټینګار یې وکړ چې د بدخشان پوهنتون علمي او اداري کادر غړې باید له الکترونیکي حکومتولۍ سره په ښه توګه بلد وي او زدکړیالانو ته د ښو خدمتونو وړاندې کولو په برخه کې سم عمل وکړي.
د بدخشان پوهنتون رییس د علمي او اداري کارکوونکو ظرفیت لوړول یو مهم اصل یاد کړ او زیاته یې کړه چې په اوسني وخت کې له انټرنیټ څخه ښه ګټه اخیستنه خپلو لوړو موخو ته په رسېدو کې موږ سره مرسته کوي، او د بدخشان پوهنتون هېڅ غړی باید له انټرنیټ او معاصر ټکنالوژۍ څخه لیرې پاتې نه شي.
د بدخشان پوهنتون د کمپیوټر ساینس پوهنځي سرپرست پوهنیار محمد ظفر نبي زاده وویل چې په پام کې ده د یاد پوهنتون مشرتابه د لارښوونې پر بڼسټ د بدخشان پوهنتون استادانو او کارکوونکو ته په دې برخه کې نور پروګرامونه هم جوړ شي.
