د لوړو زده کړو سرپرست وزیر د کندهار پوهنتون، طب پوهنځي او تدریسي روغتون له استادانو او ډاکټرانو سره د کتنې ترڅنګ د ابراهیم النخعي رحمه الله جامعې څخه لیدنه وکړه.
د لوړو زده کړو سرپرست وزیر محترم شیخ الحدیث مولوي نداء محمد ندیم، کندهار ولایت ته د خپل رسمي سفر په ترڅ کې د ابراهیم النخعي رحمه الله جامعې څخه د لیدنې سربېره د کندهار پوهنتون، طب پوهنځي او تدریسي روغتون له استادانو، ډاکټرانو او کارکوونکو سره وکتل او د طب ارزښت او مقام بیانولو ترڅنګ یې، هغوی د محصلانو ښې روزنې او لا صادقانه خدمت ته وهڅول.
هغه دغه راز وویل، چې افغانستان په طبي برخه کې متخصصینو او غوره روغتیا پالانو ته اړتیا لري او د ا.ا ا په ځانګړي ډول لوړو زده کړو وزارت هڅه کوي، څو راتلونکي کې د نورو برخو تر څنګ، طبي برخه کې هم غوره بشري قوه وروزي.
محترم سرپرست وزیر استادان وهڅول، چې په طبي برخو کې د نویو موضوعاتو، پرمختګونو او اړتیاوو سره سم د محصلینو روزنه وکړي او داسې کادرونه ټولنې ته وړاندې کړي، چې په روغتیایي برخه کې د نورو له احتیاجه خلاص شو.
نوموړي د کندهار طب پوهنځي او تدریسي روغتون له بېلابېلو برخو څخه لیدنه وکړه او د مسؤلینو ستونزې یې واورېدې.
همدارنګه د لوړو زده کړو سرپرست وزیر د کندهار ابراهیم النخعي رحمه الله جامعې څخه په داسې حال کې لیدنه او د جامعې له استادانو، فاضلانو او اداري کارکوونکو سره ناسته وکړه چې د کندهار مشهور دیني عالم محترم شیخ الحدیث مولوي نظر محمد، د جهادي مدارسو رئیس محترم مولوي عبدالواحد طارق او د علماوو شورا رئیس محترم شیخ الحدیث ملوک شاه آغا صاحب یې هم ملتیا کوله.
په ناسته کې محترم سرپرست وزیر فاضلانو ته د علم په ترلاسه کولو او ورځنیو درسونو کې کوښښ په اړه لازمې سپارښتنې وکړې او د هغوی غوښتنې او ستونزې یې د حل په موخه واورېدې.
نېټه: شنبه
۱۴۴۶ هـ.ق د جمادي الاول ۲۱مه
۱۴۰۳ هـ.ش د قوس ۳ مه
۲۰۲۴م د نومبر ۲۳ مه
