د لوړو زده کړو سرپرست وزیر په حضور کې د کابل پوهنتون ممتاز محصلین وستایل شول
په کابل پوهنتون کې په همدې مناسبت جوړو شویو مراسمو کې د لوړو زده کړو سرپرست وزیر محترم شیخ الحدیث مولوي نداء محمد ندیم دا ډول غونډې د علمي سلسلې یوه برخه وګڼله او محصلینو ته یې وویل: «قدرمنو ځوانانو په دنیاوي او اخروي امورو کې بریا په زحمتونو او هڅو تر لاسه کېږي، نو په علمي ډګر کې د بریا لپاره باید هڅې وشي او ستونزې وګالل شي.»
محترم شیخ صاحب وویل، چې د ا.ا.ا هڅه دا ده چې د هېواد ځوانان په دیني او عصري زده کړو کې ښه وړتیا او مقبولیت ولري او ټولنې ته یې خیر ورسیږي.
همدارنګه د لوړو زده کړو وزارت د محصلانو د خدمتونو او همغږۍ رییس استاد کلیم الله محمدي او د کابل پوهنتون رییس دوکتور اسامه عزیز محصلین په خپلو درسونو کې لا زیات زیار ته وهڅول.
د غونډې په پای کې شاوخوا ۷۵ تنه ممتاز محصلین، چې د پوهنتون، پوهنځيو او څانګو په کچه یې ښه وړتیا ښودلې وه، په بېلا بېلو ډالیو ونازول شول.
نېټه: سه شنبه
۱۴۴۷ هـ.ق د محرم الحرام ۵ مه
۱۴۰۴ هـ.ش د چنګاښ ۱۰ مه
۲۰۲۵ م د جولای لومړۍ
