د لوړو زده کړو نوماند او سرپرست وزير د افغانستان کوچيانو له حقوقو څخه د دفاع له ټولنې سره ولیدل
"لوړو زده کړو ته نه لاسرسی او محروميت يو ملي خنډ دی، خو په ځانګړي ډول د دروند کوچي قوم ځوانان د زده کړو په بهیر کې د اسانتیاوو د نشتوالي له کبله د زده کړو له نعمت څخه بې برخې دي".
دغه مطلب د لوړو زده کړو نوماند او سرپرست وزير دوکتور عباس بصیر د افغانستان کوچيانو له حقوقو څخه د دفاع له ټولنې سره بیان کړ.
په دې ليدنه کې د افغانستان د کوچيانو له حقوقو څخه د دفاع ټولنې مشر ډاکټر مصور ملاخېل وويل څومره چې دوکتور عباس بصير پېژني هغه يوه ډيپلوماتیکه څېره ده چې تل يې په نظام کې په يوې ملي روحيې سره کار کړی دی. نوموړي زياته کړه: "نن راغلي يو، هم مبارکي درته ووايو او هم مو له پروګرامونو د ملاتړ ژمنه درسره وکړو؛ دا هم وښيو چې د لوړو زده کړو وزير د افغانستان د ټولو قومونو وزير دی چې د ټولو افغانانو له پاره د ښوونې او روزنې د پراختیا په برخه کې کار کوي".
وروسته د لوړو زده کړو نوماند سرپرست وزير دوکتور عباس بصير د افغانستان د کوچيانو د حقوقو د دفاع له ټولنې مننه کړه ويې ويل چې د لوړو زده کړو وزارت د افغانستان د ټولو قومونو ګډ کور دی، د هېواد په علمي بنسټونو کې د سولي کلي ده او د ملي يووالي د بنسټ ډبره هم له همدې ځایه اېښودل کېږي.
د لوړو زده کړو وزارت نوماند سرپرست وزير وویل څه چې وزارت پرې متمرکز دی هغه د ملي وحدت د روحيې پياوړتیا او د کثرت ګرايي او يو بل د منلو په بنسټ زده کړې دي". د هغو محصلينو له پاره چې د زېږېدو له سيمو څخه په قومي، سمتي او محلي ليدلوري سره پوهنتونونو ته راځي زموږ سپارښتنه دا ده چې د پوهنتونونو په علمي چاپېريال کې له څلور کلونو زده کړو وروسته په يوه ملي فکر سره کلي ته لاړ شي او د سولي، ملي يووالي او همدلۍ پيغام وړونکي شي".
دوکتور عباس بصير زیاته کړه چې په همدې منظور له يوه ولايت څخه بل ولايت او له يوه سمت څخه بل سمت ته د علمي سفرونو پروګرامونه د لوړو زده کړو وزارت په کاري فعاليتونو کې راځي چې محصلين د سيمو له فرهنګونو او دودونو سره د اشنايي تر څنګ محروميتونه هم په خپلو سترګو وويني او پوه شي، محروميت څه دی چې د ټول افغانستان لمن يې نيولې ده. په دې سره د ګډ کار احساس پيداکېږي او دا لامل کېږي چې په پوهنتونونو کې د تلپاتې همدلۍ احساس را ژوندی او بنسټيز شي.
د لوړو زده کړو نوماند او سرپرست وزير وويل چې که په ولسي جرګه کې د خلکو د استازو د باور رايه واخلي نو د کوچي قوم د ځوانانو تحصيل به يې له لومړيتوبونو څخه وي. نوموړي همداراز زياته کړه چې د لوړو زده کړو وزارت دروازه به تل د کوچي محصلينو پر مخ خلاصه وي او د دوی له پاره به دا موکه برابروي.
د افغانستان د کوچيانو له حقوقو څخه د دفاع ټولنې د لوړو زده کړو د نوماند او سرپرست وزير د دوکتور عباس بصير د پروګرامونو په اورېدو له نوموړي ملاتړ وکړ او د لونګۍ په ور په سر کولو سره يې له نوموړي مننه وکړه.