د کابل پوهنتون بېلابېلو پوهنځیو ممتاز محصلین د چین سفارت له لوري په یاد پوهنتون کې د جوړې شوې غونډې په ترڅ کې وستایل شول

دغه غونډه چې د لوړو زده کړو وزارت د محصلانو د خدمتونو او همغږۍ او امارتي محصلانو چارو رئیسانو، په کابل کې د چين سفير او د کابل پوهنتون رهبري پلاوي په ګډون، په یاد پوهنتون کې جوړه شوې وه، د چین سفارت له خوا د یاد پوهنتون بېلابېلو پوهنځیو ۶۰ تنو ممتازو محصلینو ته نغدي ډالۍ ورکړل شوې.

په غونډه کې د لوړو زده کړو وزارت د محصلانو د خدمتونو او همغږۍ رئیس استاد کلیم الله محمدي د چین هېواد له همکارۍ څخه د مننې ترڅنګ، له محصلینو وغوښتل چې لا زیاتې هڅې وکړي، څو افغانستان په خپلو پښو ودریږي او په ځان بسیا شي.

نوموړي د لوړو زده کړو وزارت له ادرسه د چین سفیر او د کابل پوهنتون مشرتابه ته د محصلانو لپاره د لا ښه خدمتونو وړاندې کولو په برخه کې د هر ډول همکارۍ ډاډ ورکړ.

همدارنګه په افغانستان کې د چین سفیر جاو شینګ له لوړو زده کړو وزارت سره خپلې اړیکې مهمې وبللې او ویې ویل: «موږ په علمي برخو کې خپلې اړیکې پراخوو او محصلین هڅوو.» هغه زیاته کړه چې په علمي ډګر کې اړیکې یې، د افغانستان په ځانبسیاینه کې مهم رول لوبولی شي.

دغه راز د کابل پوهنتون رئيس دوکتور اسامه عزيز هم له کابل پوهنتون سره د چين د همکارۍ له امله مننه وکړه او ویې ویل، چې دا همکارۍ د افغانستان او چین تر منځ د علمي اړیکو په پیاوړتیا کې مهم رول لرلی شي.

نوموړي له چين سره د افغانستان د اړیکو ارزښت ته په اشارې سره، له یاد هېواد څخه وغوښتل چې د کابل پوهنتون د انجنيري، ټکنالوژي او ساينس په تخصصي برخو کې خپلې تجربې د کابل پوهنتون له محصلينو سره شريکې کړي، څو د افغانستان په ځانبسیاینه کې خپل رول ولوبوي.

په یاده غونډه کې د کابل پوهنتون يو شمېر ممتازو محصلانو هم خبرې وکړې، د دغه شان غونډو په جوړولو يې خوښي څرګنده کړه او د پوهنتون د علمي او تدريسي برخو په پياوړتيا کې يې له چين هېواد څخه د لا زياتو همکاريو غوښتنه وکړه.

غونډه د کابل پوهنتون ممتازو محصلینو ته د نغدي ډالیو او ستاینلیکونو په وېشلو سره پای ته ورسېده.

نېټه: دوشنبه

۱۴۴۶ هـ.ق د جمادي الاخرة ۷ مه

۱۴۰۳ هـ.ش د لیندۍ ۱۹ مه

۲۰۲۴ م د ډسمبر ۹ مه