کندهار پوهنتون کې څلور مهمې پروژې پرانستل شوې
د لوړو زده کړو وزارت علمي معین په کندهار پوهنتون کې څلور مهمې پروژې پرانستې.
دغه پروژې د ډاکتر حضرت میر توتاخيل د علمي څيړنو مرکز،د پوهاند میر حسین شاه تالار، د اقتصاد پوهنځي تالار او د هوا پېژندنې د مرکز د پروژو پرانسته ده.
د دغه پروژو د پرانستې پر مهال د یادو تالارونو د نوم ایښودنې په پار، چې د دوو علمي شخصیتونو د کندهار پوهنتون د پخواني رئیس ډاکتر حضرت میر توتاخیل او د کابل پوهنتون د یو تن تکړه استاد او لیکوال په نومونو د دوو بیلابیلو تالارونو نومولو له کبله د کندهار پوهنتون له علمي شورا څخه مننه وکړه . هغه څرګندنه کړه، ډاکټر حضرت میر توتاخيل د دې علمي بنسټ د پرمختګ لپاره له ۱۲ کلونو زیات د هیواد د قوانینو په رڼا کې متعهدانه هلې ځلې وکړې او د دې پوهنتون موقف يې د هیواد په پوهنتونونو کې پخپلو هڅو او زیارثابت کړ.
د لوړو زده کړو وزارت علمي معین د ډاکټر حضرت میر توتاخيل او پوهاند میر حسین شاه د زحمتونو او هڅو څخه د قدردانۍ په ترڅ کې له ځوانانو په ځانګړې توګه د محصلانو څخه وغوښتل، چې دغه دوه شخصیتونه د خپل ژوند الګو او مثال وګرځوي او هيواد ته د خدمت مصدر شي.
همداراز د ډاکتر حضرت میر توتاخیل ورور ډګروال اولمیر توتاخيل د لوړو زده کړو وزارت له رهبرۍ او د کندهار پوهنتون څخه د دې اقدام له امله مننه وکړه، نوموړي د ډاکتر حضرت میر توتاخيل په نوم د دې ستر مرکز نومول کیدل، د توتاخیل هغو هڅو او تلاشونو ته د مسئولینو د قدر په سترګه کتل وبلل، کوم چې نوموړي د خپل خدمت پر مهال د ناروغۍ پر مهال په ډېره مینه او لیوالتیا د دې پوهنتون لپاره تر سره کړي وو،د کندهار پوهنتون د رئیس پوهاند ډاکټر عبدالواحد وثیق د وینا له مخې؛ د علمي څيړنو د مرکز جوړول چې د نړیوال بانک (HEDP) په مالي مرسته، د ادبیاتو او اقتصاد د پوهنځيو تالارونه، چې د لوړو زده کړو وزارت پر بودیجه او د هوا پيژندنې د مرکز رغول، چې د المان هیواد په مالي مرسته جوړ شوي دي،د دې علمي بنسټ د تدریسي او تحقیقاتي چارو د پر مخ وړلو په برخه کې به زیات اغیزمن تمام شي.