د لوړو زده کړو وزارت د درېیم ستراتېژيک پلان مسودې د څېړنې ناسته جوړه شوه
د لوړو زده کړو وزارت د درېیم ستراتېژيک پلان مسودې د څېړنې ناسته نن د یاد وزارت د مالي او اداري معین نور احمد دروېش په مشرۍ جوړه شوه.
دغه ناسته کې د لوړو زده کړو وزارت د ستراتېژيک پلان په منځپانګه او شاخصونو، کارشناسۍ او اړوندو موضوعاتو بحث او خبرې وشوې.
د لوړو زده کړو وزارت مالي او اداري معین نور احمد دروېش د لوړو زده کړو وزارت درېیم ستراتېژيک پلان مهم وباله او زیاته یې کړه؛ چې ددغه پلان مهم شاخصونه د کیفیت لوړاوی، اقتصادي پرمختګ، ښه حکومتولۍ، نوښت او په تحصیلي او اداري نظام کې له معلوماتي ټکنالوژۍ څخه ګټه اخیستل دي.
نوموړي ټینګار وکړ چې د کار بازار اړتیاوو پر بنسټ په ښوونیز، اقتصادي پرمختګ او پراختیا برخو کې د کیفیت لوړاوی، د لوړو زده کړو وزارت درېیم ستراتېژيک پلان له لومړیتوبونو څخه دي.
دغه پلان به تر څېړنې او کتنې وروسته د سمون لهپاره د لوړو زده کړو وزارت رهبري شورا ته وړاندې شي. د لوړو زده کړو وزارت درېیم ستراتېژيک پلان د نورو پلانونو سره سره د لس کلونو لهپاره دی.
