د اعتبار ورکولو او کيفيت د تضمين د چوکاټ او د لوړو زده کړو د بنسټونو د بيا ارزونې د طريقو روزنيز ورکشاپ پای ته ورسېد
په افغانستان کې د لوړو زده کړو کیفي ارتقا په صداقت او عادلانه توګه د قانون او مقرراتو سره سم د دندو په اجرا کولوپورې تړاو لري، چې د پوهنتونونو، لوړو زده کړو دولتي او خصوصي موسسو څخه د ټاکل شوي پلاوي پر بیا کتنه به ترسره شي.
دغه مطلب د لوړو زده کړو وزارت علمي معین پوهنمل عبدالتواب بالاکرزي نن د هغه زده کړه ییز ورکشاپ د ختم په مراسمو کې څرګند کړ چې څلور ورځې وړاندې د کیفیت د تضمین او اعتبار ورکړې په منظور د لوړو زده کړو وزارت له خوا د تحصیلي بنسټونو د بیا کتنې په پار پیل شوی و.
په پام کې ده چې د ۴۰ تحصیلي بنسټونو د بیا کتنې دغه پلاوی به د راتلونکې شنبې په ورځ دغه لړۍ پیل کړي، په دې پروسه کې ۱۱ اصلي او۴۹ فرعي معیارونه چې تحصیلي نهادونه د کیفیت د تضمین او اعتبار ورکړې د سند په اخستلو مکلفوي، پلټل کیږي.
ښاغلي بالا کرزي د ورکشاپ د ختم په مراسمو کې د بیا کتنې ډلې ته په خبرو کې د شفافیت د اصل پر رعایتولو ټینګار وکړ او ويې ویل چې د تحصیلي بنسټونو د بیا کتنې پروسه او کیفي ارتقا د موظف پلاوي په صداقت او ژمنتیا پورې تړاو لري، بالا کرزي زیاته کړه ټاکل شوی پلاوی د تصمیم نیوونکي بورډ د سترګو حیثیت لري، چې د تحصیلي بنسټونو د کیفيت د تضمین اواعتبار ورکولو چارې ترسره کوي.
د لوړو زده کړو وزارت علمي معین د بیاکتنې له پلاوي و غوښتل چې د نظر په یووالي، همغږۍ او مستندجوړولو سره د یو پرمختللي او معیاري تحصیلي نظام لپاره ایماني او هیوادنی مسئولیت ادا کړي.
هغه له یاد پلاوي غوښتنه وکړه، چې د دندې پر مهال خپل استقلالیت وساتي او په تحصیلي نهادونو کې د متناسب پرمختګ او قانوني امتیاز ورکولو هڅوونکي وي څو افغانستان په سیمه ییزه او نړیواله کچه په واقعي معنا د یو پرمختللي علمي او اکاډمیک سیستم لرونکی وي.
همدا رازپه دې اړه د کیفیت د تضمین او اعتبار ورکړې رئیس پوهندوی ډاکټر محمد نعیم عظیمي د خپلو خبرو په ترڅ کې وویل: د څلویښتو تحصیلي نهادونو د بیا کتنې په پروسه کې هغه اووه بنسټونه هم شامل دي چې مخکې يې د تضمین د کیفیت او اعتبار ورکړې سندونه تر لاسه کړي دي، هغه وویل یاد تحصیلي بنسټونه د دوامداره معیارونو په پار کتل کیږي څو معلومه شي چې معیارونه د اعتبار د ورکړې له اسنادو سره مطابقت لري که نه. عظیمي وویل د ټاکل شوو معیارونو دنه بشپړیدا په صورت کې د یادو تحصیلي بنسټونو د اعتبار سندونه ځنډول کيږي.
د هغه په خبره د بیا کتنې او نظارت پروسه په دریو بیلابیلو پړاوونو کې پیلیږي چې لږ تر لږه باید په لومړي پړاو کې ۵۱ ، په دویم پړاو کې ۷۱ او په دریم پړاو کې ۸۵ نومرې باید واخلي.
د یادونې ده چې د څارنې د پلاوي ماسټر ترینرانو په دې اړه په مالیزیا هیواد کې زده کړې بشپړې کړي دي چې وروسته يې په هیواد دننه یو شمیر استادانو ته هم د تحصیلي بنسټونو د بیا کتنې زده کړې ورکړي دي.
