د لوړو زده کړو وزارت د مشرتابه پلاوي او ابن سینا طبي پوهنتون د مشرتابه ګډه مشورتي ناسته وشوه
دغه ناسته چې د ابن سینا طبي علومو پوهنتون کې جوړه شوې وه، لوموړی د یاد پوهنتون رییس دکتور محمد اقبال حماد د ټولو کارکوونکو او استادانو د زحمتونو او خدمتونو د قدرداني ترڅنګ په هېواد کې د اشغال پای ته رسېدو او د ا.ا.ا د راتګ په اړه ټولو ته مبارکي وویله.
او له ټولو استادانو او اداري کارکوونکو څخه یې وغوښتل چې په هېواد کې د تعلیم د پرمختګ او په کار پوهو او لایقو کدرنو د ودې او د هېواد د ودانولو لپاره هڅې وکړي.
د لوړو زده کړو وزارت د نشراتو، اطلاعاتو او عامه اړیکو رییس دکتور دلاور سیلاب د قرآن او ساینس برخه کې او همداراز د دغه سپېڅلي کتاب (قرانکریم) د بېلابېلو معجزو په اړه ګډونوالو ته هر اړخیزې او تفصیلي ویناوې وکړې.
په ناسته کې شیخ الحدیث مولوي شاه محمد د ا.ا.ا د برنامو او موخو په اړه د ویناوو سربېره د عمومي بښنې، امنیت، سولې او د اسلام مبارک دین د واکمنېدو په اړه مهمې ویناوې وکړې او په ټول هېواد کې یې د تحصیل اسانېدو او آرامۍ په اړه ډاډ ورکړ او ټول استادان او کارکوونکي یې خپلو کارونو ته وهڅول.
همداراز د طبي علومو پوهنتون علمي مرستیال پوهاند دکتور نجیب الله، د طبي لوړو زده کړو د پراختیا رییس پوهاند دکتور احمد فرید برنایار، د دغه پوهنتون د اسلامي ثقافت څانګې استاد پوهندوی عبدالخالق مصباح په خپل وار سره د یاد پوهنتون د استادانو په استازولۍ وینا وکړه او ډاډ یې څرګند کړ چې د هېواد د آبادۍ او پرمختګ لپاره به هېڅ ډول همکارۍ او هڅې ونه سپموي. دوی د دولتي پوهنتونونو د درسونو په ژر پیلېدو ټینګار وکړ.
