میرویس خان نیکه زابل د لوړو زده کړو موسسې د محصل نړیواله ورځ ونمانځله
میرویس خان نیکه زابل د لوړو زده کړو موسسې د محصل نړیواله ورځ په داسې حال کې ونمانځله، چې د موسسې د رهبري، اداري کارکوونکو، استادانو او د بېلابېلو پوهنځیو سلګونو محصلانو سربېره پکې د زابل مرستیال والي ښاغلي عنایت الله خان هوتک، د زابل د پوهنې محترم رئیس نصرالله زاهد، د ارشاد، حج او اوقافو محترم رئیس، د کرنې، مالداري او اوبولګونې محترم رئیس، د اقتصاد ریاست محترم رئیس، قومي مخورو، مدني فعالانو او د رسنیو استازو ګډون کړی و.
د موسسې رئیس ښاغلي پوهنیار رحمت الله کاکړ ټولو ګډونوالو ته د هرکلي او ښه راغلاست مراتب وړاندې کړل. نوموړي د نمانځغونډې د تنظیم په پار د محصلانو او میرویس خان نیکه زابل د لوړو زده کړو موسسې له هغو ټولو استادانو او کارکوونکو څخه مننه وکړه او ویې ویل چې د تل غوندې به یې هڅه دا وي چې د موسسې د اداري، مالي، فزیکي او همدارنګه علمي سرچینو انکشاف ته تر ممکنه بریده په ولایتي، ملي او نړيواله کچه زمینه برابره او په مؤثره او مثمره توګه ترې د میرویس خان نیکه زابل د لوړو زده کړو موسسې هر محصل، اداري کارمند او استاد ګټه واخیستلای شي.
د زابل ولایت محترم مقام مرستیال والي ښاغلي الحاج عنایت الله خان هوتک د افغانستان ټول والدین، محصلان او د پوهنې د ډګر ټول مستقیم او نامستقیم ښکېل اړخونه اتلان وبلل، چې له لسیزو جګړې او غربت سره سره یې زده کړې ته مخه کړې ده؛
د میرویس خان نیکه زابل د لوړو زده کړو موسسې د علمي او محصلانو چارو مرستیال ښاغلي پوهنمل حمدالله حمیم د غونډې ګډونوالو ته ښه راغلاست او مبارکي وویله، د موسسې تېر او اوسنی وضعیت یې د لاسته راوړنو، ستونزو او خنډونو په پار سره پرتله کړ؛ د ظرفیت لوړونې او سرچینو د پراخوالي لپاره یې له نورو اداراتو سره د هوکړه لیکونو د لاسلیک ژمنه وکړه او د زابل ولسونو او د پوهنې محترم ریاست ته یې ډاډ ورکړ، چې په نږدې راتلونکې کې به په ښوونځیو کې په کار پوه او مسلکي استادان ولري.
د زابل ولایت د پوهنې محترم رئیس ښاغلي نصرالله زاهد تر سلام او ښه راغلاست ویلو وروسته د کابل پوهنتون د خونړي برید قرباني شویو محصلانو ته دعا او غم شریکي وړاندې کړه او ویې ویل چې دولت، ملي یووالي ته ژمن دی او نننۍ غونډه ددې څرګند ثبوت دی، راځئ د تور او سپین او اقلیت او اکثریت خبره له منځه یوسو او په ګډه سره د هېواد د آبادۍ لپاره مټې راونغاړو.
