د لوړو زده کړو وزارت علمي معین له هغو استادانو سره وکتل چې د پاکستان هېواد په نسټ (NUST) پوهنتون کې د لنډمهاله روزنیزو ورکشاپونو له تر لاسه کولو وروسته هېواد ته راستانه شوي وو.
د لوړو زده کړو وزارت علمي معین دوکتور لطف الله خیرخواه د هېواد مختلفو پوهنتونونو او بېلابېلو پوهنځیو له هغو استادانو سره وکتل، چې د پاکستان نسټ پوهنتون ته د ظرفیت لوړونې او ګډو علمي پروګرامونو په موخه د لنډمهاله روزنیزو ورکشاپونو لپاره تللي وو.
یادو استادانو د لوړو زده کړو وزارت علمي معین ته د خپل علمي سفر او ورکشاپونو په اړه معلومات ورکړل، د پاکستان هېواد د علمي کهول، په ځانګړي ډول نسټ پوهنتون د مسؤلینو چلند یې وستایه او د دواړو هېوادونو تر منځ یې پر ګډو علمي پروګرامونو ټینګار وکړ.
دغه راز د لوړو زده کړو وزارت علمي معین دوکتور لطف الله خیرخواه د یادو استادانو وړاندیزونه واورېدل او ترې ویې غوښتل چې په ورکشاپونو کې زده مهارتونه خپلو محصلینو ته ورسوي او په ورځنیو چارو کې کار ترې واخلي.
د یادولو وړ ده چې په دغه علمي سفر کې د هېواد له مختلفو پوهنتونونو څخه په دوو ټیمونو کې شاوخواه ۵۸ استادانو ګډون کړی و، چې شاوخوا دری اونۍ یې دوام وکړ.
