د لوړو زده کړو وزیر د اووم تحصیلي نندارتون په پای غونډه کې ګډون وکړ
د لوړو زده کړو وزیر دوکتور عباس بصیر په دغه غونډه کې وویل چې که د پوهنتونونو معلوماتي نندارتونونه د تحصیلي تولیداتو وړاندې کولو پر نندارتونونو بدل شي نو د پام وړ اغېز به ولري. عباس بصیر خوښي څرګنده کړه چې د ورته نندارتونونو په جوړولو سره د لوړو زده کړو وزارت او د لوړو زده کړو خصوصي بنسټونو تر منځ همغږي او اړیکې لاپراخېدی شي او دا یوه ډېره مهمه موضوع ده چې باید نور هم ورته پام وشي.
د نوموړي په وینا په ټوله کې د پوهنتونونو لومړی نسل زده کړې دویم یې څېړنې او درېیم یې تولید کوي؛ چې دا د لوړو زده کړو وزارت له کاري لومړیتونو څخه دی څو تحصیلي نظام له ښوونیز څخه څېړنیز ته واړوي.
د لوړو زده کړو وزیر وویل چې د نړۍ پرمختللو پوهنتونونو د څېړنو پر بنسټ پرمختګ کړی او دا ښکاره ده چې له څېړنو پرته به موږ د تحصیلي نظام پرمختګ کې کوم د پام وړ بدلون ونه وینو، ځکه چې پرته له څېړنو او تولید څخه د تحصیلي نظام پیاوړتیا او پرمختګ ناشونی دی.
د یاد تحصیلي نندارتون په پای غونډه کې د لوړو زده کړو وزیر او د دغه وزارت ویاند پوهنیار حامد عبیدي سربېره د یوشمېر نورو دولتي او خصوصي ادارو چارواکو او مسوولینو هم ګډون کړی و.
د یادونې ده چې دغه تحصیلي نندارتون څلور ورځې وړاندې کابل کې د افغانستان د نندارتون په مرکز کې پرانیستل شو.
