د ننګرهار پوهنتون ۱۵۰۰ تنه محصلینو د «تعلیم الاسلام کتاب» سیالۍ کې ګډون وکړ .
یاده سیالي چې د لوړو زده کړو وزارت د محصلانو خدمتونو انسجام او همغږۍ ریاست په نوښت جوړه شوې وه، د پرانیستې په مراسمو کې د یاد پوهنتون رئیس شیخ انعام الله مدني د محصلینو د تخصصي زده کړو تر څنګ په اسلامي عقیدې او فکر د محصلینو روزلو په برخه کې د لوړو زده کړو وزارت له دې نوښت څخه مننه وکړه.
د لوړو زده کړو وزارت د محصلانو خدمتونو انسجام او همغږۍ رئیس کلیم الله محمدي د خپلې وینا پر مهال وویل: « دغه سیالۍ څخه موخه له یوې خوا د محصلانو د دیني معلوماتو د کچې زیاتوالی او له بلې خوا نړیوالو علمي سیالیو ته د محصلانو چمتو کول دي.»
دغه راز نوموړي له محصلانو سره د هغوی د منسجم کولو، اړوندو ادارو سره د همغږي کولو، د هغوی ظرفیت لوړولو، د عملي کارونو د زمینې برابرولو او ورته د کاري فرصتونو رامنځ ته کولو ژمنې وکړې.
د یادونې وړ ده، چې د یادې سیالۍ لومړی، دویم او درېیم مقام ګټونکو محصلانو ته لپټاپ کمپیوټرونه او تر لسم مقام ګټونکي پورې نور بېلابېل جوایز په پام کې نیول شوي دي.
