د اساسي قانون د تصويب اويايمه کليزه ونمانځل شوه
اساسي قانون تر ټولو لوړ تقنیني سند دی چې د یو هېواد د سیاسي ځواک او خلکو تر منځ اړیکه ټینګوي.
دغه مطلب د لوړو زده کړو وزیر ډاکتر عباس بصیر د اساسي قانون د اوولسمې کلیزې په غونډه کې چې د لوړو زده کړو په وزارت کې جوړه شوې وه، څرګند کړ.
په دې غونډه کې د اساسي قانون پر پلي کېدو د څار د خپلواک کمیسیون غړي ډاکتر ابوبکر متقي، د لوړو زده کړو وزارت معینان، د مرکزي ادارو او د دولتي پوهنتونونو یو شمېر ريیسانو هم ګډون درلود.
د لوړو زده کړو وزیر اساسي قانون یو غوره قانون وباله چې په وینا يې (د بشري حقونو پر یو لړ اصولو او مشخصو بنسټونو ولاړ دی او د افغانستان د عزتمن ملت د تړاو مهم عامل ګڼل کېږي.
هغه زیاته کړه له دې پلوه دا قانون د افغانستان د قوانینو د تصویب په تاریخ کې د عطف ټکی دی چې په هغې کې توکمي، فرهنګي تکثر او کوچنی هویت د افغان د ستر هویت تر چتر لاندې په رسمیت پېژندل شوی دی او لوړو زده کړو ته لاسرسی، د نیوکې حق، د بیان ازادي په ښکاره توګه پکې تسجیل شوي دي.
د لوړو زده کړو وزیر ټینګار وکړ، د تحصیلي نظام رول د قانون د تفسیر، فهم او پراختیا په برخه کې له قانون څخه مهم دی، لوړو زده کړو وزارت هڅه کوي څو د فکر او نظر د زېږوونکو په توګه د اساسي قانون د تفسیر او تشریح مرجع وي او حقوقو د پوهنځيو له لارې په دې برخه کې خپل مسولیت اداء کړي.
د اساسي قانون پر پلي کېدو د څارنې کمیسیون غړي ډاکتر ابوبکر متقي هم په دې اړه او د اساسي قانون د بډای کولو لپاره له قانون څخه د پوهې د دود کېدو په برخه کې، د لوړو زده کړو وزارت پر رول خبرې وکړې او ويې ویل، د زیاتره اسلامي هېوادونو په قوانینو کې د اسلام مبارک دین د خلکو دین بلل شوی دی، خو د افغانستان د اساسي قانون په دویمه ماده کې، د دولت دین، اسلام بلل شوی دی چې دا پخپله د ټولو اسلامي هېوادونو پر قانون د افغانستان د اساسي قانون غوره والی ښيي.
ډاکتر متقي همداراز وویل، د افغانستان اساسي قانون د جنسیت او نورو عواملو له نظره د تبعیض عوامل له منځه وړي دي او د ټولو اقشارو د یو ډول فعالیت زمینه يې پر رسمیت پېژندلې ده، هغه همداراز لوړو زده کړو وزارت ته وړاندیز وکړ، ترڅو د ټولو دولتي او غیر دولتي بنسټونو د حقوقو د پوهنځيو د محصلانو په مونوګرافونو کې د اساسي قانون د تفسیر مسئله او د یاد قانون د مادو تفسیر په نظر کې ونیسي څو له قانون څخه د خبرېدو حقوقي فهم په ټولنه کې پراختیا ومومي.
د لوړو زده کړو وزارت د محصلانو چارو معین پوهندوی سیدفرهاد شهید زاده، هم په ټولنه کې د نظم او وحدت په موخه د قانون پر اهمیت ټینګار وکړ او د ډاکتر متقي د خبرو په ځواب کې يې په دې اړه وویل، د لوړو زده کړو وزارت د مقررو، لوایحو، طرزالعملونو او لارښودونو، طرحې او تصویب ته په پراختیا ورکولو توانېدلی، د نظم راوستلو او اسانتیاوو لارې برابرې کړي او د اساسي قانون د پلي کېدو په برخه کې اساسي رول ولوبوي.
د شهید استاد رباني د ښوونې او روزنې پوهنتون ريیسې پوهندوی لیلما شریفي یما هم په دې اړه خبرې وکړې او د افغانستان اساسي قانون يې د وحدت سمبول او د تبعیض د له منځه وړلو، پرمختګ او عدالت د ټینګښت مظهر وباله. هغې وویل: (اوسنی اساسي قانون د ډموکراسۍ پر ستنو ولاړ دی چې د خلکو برابري پکې تضمین شوې ده او تبعیض پکې منع شوی دی، په ټولنه کې د ښځو پر رول ټينګار شوی دی او د دوی موقف د نارینه وو په څېر تثبیت شوی دی، محفل د افغانستان د خلکو لپاره د خیر او ارامۍ په دعا پای ته ورسېد.
