د لوړو زده کړو وزارت د معلوماتي ټکنالوژۍ ریاست د مرکزي ادارو او ټولو دولتي پوهنتونونو د انټرنېټ وصلولو او څارنې دنده پر غاړه لري.
۱۴۰۰کال، د کب ۲۱مه
د لوړو زده کړو وزارت د معلوماتي ټکنالوژۍ ریاست د مرکزي ادارو او ټولو دولتي پوهنتونونو د انټرنېټ وصلولو او څارنې دنده پر غاړه لري.
دغه ریاست د وزارت له کلیدي ریاستونو څخه دی، چې د هېواد په ټولو دولتي پوهنتونونو کې د فایبر په وسیله د محلي شبکې او کمپسونو وصلول، انلاین صنفونه، وای فای زونونه، انلاین کنفرانسونه او د کمپیوټري لابراتوارونو د جوړولو په برخه کې خدمات وړاندې کوي.
همدارنګه یاد ریاست د وزارت په داخلي ادارو کې د (Domain) سیسټم فعال کړی، د وزارت رسمي اېمېلونو، داخلي شبکي (Local Network) ستونزې حل کوي او همدارنګه د وزارت دری امریتونه؛ د دفتر ریاست (د الکترونیکي ارشیف امریت)، د اداري او زیربنا ریاست (د خدماتو امریت) او د بشري سرچینو ریاست (د ظرفیت لوړونې امریت) یې په دایمي ډول له انټرنېټ سره وصل کړي دي.
د معلوماتي ټکنالوژۍ ریاست د ټولو دولتي پوهنتونونو د زده کړیالانو لپاره معلوماتي سیسټم (HEMIS) فعال کړی، چې د زده کړیالانو ټول معلومات د کانکور له ازموینې څخه پیل د ديپلوم تر اخیتسو پورې پکې ثبتیږي. همداراز یاد ریاست د ټولو مدارسو د چارو لوی ریاست لپاره د ډيټابیس ډيزاین او جوړول، او دې ورته نور انټرنیټي خدمتونه وړاندې کړي، چې د چارو په چټکتیا کې یې د پام وړ اسانتیاوې رامنځ ته کړي دي.
د معلوماتي ټکنالوژۍ ریاست د ازموینو ملي ادراې د (NExA) سیسټم، د افغانستان د ټولو پوهنتونونو لپاره د برېښنایي (انلاین) زده کړو (HELMS) سیسټم فعالول او ځينې نور مهم کارونه د راتلونکي کال په پلان کې لري.
