مؤسسې عمومي رئیس او ورسره پلاوي د لوړو زده کړو سرپرست وزیر سره، په تدریسي روغتونونو کې د نرسانو او قابلو روزنې په برخه کې د همکارۍ کولو په موخه ناسته ترسره کړه

۱۴۴۳/۱۱/۹
۱۴۰۰/۰۱/۲۴
د (MSF) مؤسسې عمومي رئیس او ورسره پلاوي د لوړو زده کړو سرپرست وزیر سره، په تدریسي روغتونونو کې د نرسانو او قابلو روزنې په برخه کې د همکارۍ کولو په موخه ناسته ترسره کړه.

دا ناسته چې د لوړو زده کړو وزارت مقام د غونډو په تالار کې جوړه شوې وه، په کې د لوړو زده کړو سرپرست وزیر مولوي عبدالباقي حقاني، د (MSF) مؤسسې عمومي رئیس فیلیپ روبیرو او ورسره پلاوي ګډون کړی وو.

د لوړو زده کړو سرپرست وزیر په یاده ناسته کې په افغانستان کې د (MSF) مؤسسې فعالیتونه وستایل او د لا ډېرې همکارۍ غوښتنه یې وکړه.
ښاغلي حقاني وویل: " په هېواد کې د تېرو څو کالونو راهیسې د مور او ماشوم مړینه زیاته ده او په دغو برخو کې د نرسانو او قابلو روزل او ټریننګ کول مهم اقدام دی."
همدارنګه سرپرست وزیر یاد پلاوي ته په کاري ماحول کې د اسانتیاوو برابرولو، شفافیت او ورته نورو مهمو مسایلو اړونډ ډاډ ورکړ او ترې یې وغوښتل، چې په ډاډه زړه د اسلامي او ملي ارښتونو په نظر کې نیولو سره خپلو خدمتونو ته دوام ورکړي.

په دې کتنه کې د (MSF) مؤسسې عمومي رئیس فیلیپ روبیرو د لوړو زده کړو له سرپرست وزیر څخه د مننې ترڅنګ وویل: " موږ د تېرو څلویښتو کالونو راهیسې په افغانستان کې صحي خدمات وړاندې کوو او دا چاره به دوام ولري."
دغه راز نوموړي د لوړو زده کړو وزارت تر چتر لاندې په میوند تدریسي روغتون کې نرسانو او قابلو ته د داخلي او بهرنیو استادانو له طریقه د ټریننګونو ورکولو او دې برخه کې د کارکوونکو د استخدام په اړه معلومات وړاندې کړل او زیاته یې کړه، چې ددې چارې په ترسره کولو سره به د نرسانو او قابلو ظرفیت لوړ او افغانانو ته به لا ډېر خدمات وړاندې شي.