د لوړو زده کړو سرپرست وزیر شمال ختیځ زون ته د خپل کاري سفر پر دوام د کندوز پوهنتون محصلینو سره وکتل.
د لوړو زده کړو سرپرست وزیر شیخ الحدیث مولوي نداء محمد ندیم صاحب په داسې حال کې، چې د دې وزارت علمي معین دوکتور لطف الله خیرخواه او د لوړو زده کړو وزارت د مرکزي ادارو یو شمېر رئیسانو یې هم ملتیا کوله، محصلین یې د هېواد راتلونکي مسؤلین وبلل او له هغوی یې وغوښتل، چې د علم په ترلاسه کولو کې لا ډېرې هڅې وکړي.
د لوړو زده کړو سرپرست وزیر زیاته کړه، چې زمونږ هېواد کې د څو لسیزو ستونزو وروسته اوس خپلواکي او پوره امنیت رامنځته شوی; نو پکار ده چې له دې فرصت څخه په ګټې اخیستنې د خپلې مسلکي پوهې لوړولو په برخه کې پوره هڅه وکړﺉ، ترڅو د راتلونکي کې د هېواد د خدمت مصدر وګرځئ.
په دغه لیدنه کې د لوړو زده کړو سرپرست وزیر محصیلنو سره ژمنه وکړه، چې د یاد وزارت د تضمین کیفیت معیارونو په رڼا کې به د دې هېواد بچیانو ته لا غوره تدریسي او اکاډمیک چاپیریال برابر وي.
وروسته د محصلینو په استازولۍ څو تنو محصلینو خبرې وکړې او شمالي ولایتونو ته د لوړو زده کړو سرپرست وزیر په ورتګ یې له نوموړي مننه وکړه او خپلې غوښتنې، وړاندیزونه او ستونزې یې ورسره شریکې کړې، چې محترم سرپرست وزیر یې په تړاو اړونده مسؤلینو ته لازمې لارښوونې وکړې.
نېټه: چهارشنبه
۱۴۴۴/۴/۲۸هـ.ق ۱۴۰۱/۹/۲هـ.ق ۲۰۲۲/۱۱/۲۳م
د لوړو زده کړو وزارت مطبوعاتي دفتر
