د کابل پوهنتون په نوښت او د لوړو زده کړو وزارت په همکارۍ «د لوړو زده کړو پیاوړتیا» تر عنوان لاندې درې ورځنی ملي کنفرانس، نن د کابل پوهنتون په نوي اېډېټوریم کې پیل شو.
په یاد کنفرانس کې چې د ا.ا.ا یو شمېر لوړ پوړو چارواکو، د لوړو زده کړو وزارت مشرتابه، د هېواد د امارتي او خصوصي تحصیلي بنسټونو استادانو او علومو اکاډمي غړو ګډون پکې درلود، د لوړو زده کړو سرپرست وزیر شیخ الحدیث مولوي نداء محمد ندیم صاحب د کابل پوهنتون له دې نوښت څخه د مننې تر څنګ، وویل چې موږ د دا ډول کنفرانسونو د جوړولو او استادانو ته د غوره خدمت زمینې برابرولو په برخه کې همکاري او ملاتړ ته ژمن یو.
دغه راز د لوړو زده کړو سرپرست وزیر وویل چې موږ عصري زده کړو او څېړنو ته ډېره اړتیا لرو او له استادانو یې وغوښتل چې د عصري زده کړو او نویو پرمختګونو په برخه کې خپل مسؤلیت تر سره کړي.
نوموړي د یاد کنفرانس موخه په علمي ډګر کې پرمختګ، له نړۍ سره ځان سیال کول او په دغه برخه کې د نیمګړتیاوو په نښه کول وبلل.
همدارنګه د عامې روغتیا سرپرست وزیر ډاکټر قلندر عباد په ټولنه کې د استادانو او مسلکي زده کړو پر ارزښت خبرې وکړې او ویې ویل چې یوه ټولنه له عصري او تخصصي زده کړو پرته پرمختګ نه شي کولی.
وروسته د لوړو زده کړو وزارت علمي معین دوکتور لطف الله خیرخواه وویل: «لوړو زده کړو وزارت د علم د خپرېدو، لېږد او تولید دنده پر غاړه لري.» نوموړي زیاته کړه چې لوړو زده کړو وزارت د علم د تولید او څېړنو په برخه کې ډېره هڅه کوي او په دې ډګر کې یې عملي کارونه پیل کړي دي.
همدارنګه د کابل پوهنتون رئیس دوکتور اسامه عزیز د یاد کنفرانس په اړه معلومات ورکړل او ویې ویل چې په دغه کنفرانس کې د سلو امارتي او خصوصي تحصیلي بنسټونو علمي کادر ګډون کړی، چې شاوخوا ۷۰ مقالې د کنفرانس د بورډ له لوري غوره شوي او ۱۸ مقالې به دلته وړاندې شي. نوموړي زیاته کړه چې دغه مقالې پر نړیوالو معیارونو لیکل شوي او نړیوال حیثیت لري.
همداراز د چارو ادارې عمومي رئیس، د داخلې وزارت او اطلاعاتو او کلتور وزارت معین صاحبانو د علم پر ارزښت خبرې وکړې.
په پام کې ده چې دغه کنفرانس په سبا او بل سبا هم دوام وکړي او د استادانو له لوري به د لوړو زده کړو پیاوړتیا په برخه کې علمي ـ څېړنیزې مقالې وړاندې شي.
نېټه: سه شنبه
۱۴۴۴/۷/۳۰هـ.ق ۱۴۰۱/۱۲/۲هـ.ش ۲۰۲۳/۲/۲۱
