د لوړو زده کړو وزارت علمي معین په ګډون، د بایزید روښان خصوصي لوړو زده کړو مؤسسه کې د «فکري ویښتابه» تر سرلیک لاندې علمي سمینار دایر شو.

یاد سمینار کې د لوړو زده کړو وزارت علمي معین سربیره، د دې وزارت د دعوت او ارشاد رئیس شیخ شاکرالله وحدت، د پلان او پالیسۍ رئیس مفتي رضوان الله منیب، د تألیف، تحقیق او ژباړې رئیس دوکتور حمیدالله مزمل، د مختلفو وزارتونو او دولتي ادارو استازو، د مؤسسې رهبرۍ، استادانو، محصلینو، اداري او خدماتي کارکوونکو ګډون کړی و.
په سمینار کې د لوړو زده کړو وزارت علمي معین  دوکتور لطف الله خیرخواه محصلینو ته د انسان مقام، د نیواکګرانو د فکري یرغل اسباب او له هغو څخه د خلاصون لارې چارې په ګوته کړې.
د لوړو زده کړو وزارت علمي معین د واک د تږو بیلګې وړاندې کړې او ویې وویل، چې  دوی د خپل قدرت د بقا لپاره داسې قوانین وضع کوي، چې انساني ټولنه د انسانیت له دایرې څخه باسي او د خپلو شومو موخو ترلاسه کولو لپاره داسې برنامې په لاره اچوي، چې انسان د انزوا پر لور بیایي.
نوموړي دغه راز وویل، چې دغه ډول خلک د خپلوۍ اړیکې له منځه وړي او ټول د خپل حاکمیت لاندې داسې اړمن کوي، چې هېڅکله یې پر وړاندې غږ پورته نکړي. هغه د فکري ویښتابه په برخه کې د تعلیمي او تحصیلي بنسټونو ونډه مهمه وګڼله او په دې برخه کې یې د لا ډېر کار ژمنه وکړه.
همدارنګه د لوړو زده کړو وزارت د عوت او ارشاد رئیس شیخ شاکرالله وحدت د سمینار په ترڅ کې په زده کړه ییز بهیر کې د محصلینو مسؤلیتونو روښانه کولو ترڅنګ پر دیني او عصري زده کړو ټینګار وکړ او په دې برخه کې یې د ا.ا.ا د هڅو او کلکې ارادې ډاډ ورکړ.
نوموړي وویل، چې اسلامي ټولنې لپاره د دیني زده کړو تر څنګ عصري زده کړې خورا مهمې دي او د عصري زده کړو پرته د اسلامي ټولنې اړتیاوې نشي تأمین کېدای.
په سمینار کې د یادې مؤسسې رئیس سید عبدالحکیم حکمت د لوړو زده کړو وزارت پلاوي او نورو میلمنو ته د ښه راغلاست تر څنګ د سمینار په ارزښت او اړتیا خبرې وکړې او د محصلینو فکري روزنه یې د پوهنتونونو رسالت وبال. 
په پای کې د لوړو زده کړو وزارت علمي معین دوکتور لطف الله خیرخواه له لوري موضوع په تړاو د محصلینو پوښتنو ته ځوابونه وویل شول.