د لوړو زده کړو وزارت علمي معین په خپل کاري دفتر کې پاکستان هېواد ته د افغان علمي کادرونو د علمي سفر له مسؤل څخه د یاد سفر راپور واورېد.
د پاکستان هېواد د لوړو زده کړو کمېسیون په رسمي بلنه د هېواد بېلا بېلو تحصیلي بنسټونو علمي کادرونه د ظرفیت لوړونې او تجروبو شریکولو په موخه پاکستان هېواد ته علمي سفر کړی و، چې هېواد ته له راستنېدو وروسته د یاد سفر مسؤل او د هلمند پوهنتون مالي او اداري مرستیال ډاکټر سمیع الله سعید د لوړو زده کړو وزارت له علمي معین دوکتور لطف الله خیرخواه سره د دغه سفر لاسته راوړنې او راپور شریک کړ.
په یاده لیدنه کې د لوړو زده کړو وزارت علمي معین له نړیوالو پوهنتونونو سره د هېواد د پوهنتونونو د علمي او اکاډمیکو اړیکو، دوه اړخیزو تړونونو او تجروبو پر شریکولو ټينګار وکړ.
دغه راز د یاد سفر مسؤل وویل چې د دې سفر پر مهال مو د اکاډمیک مدیریت، رهبرۍ، تدریس او څېړنې په برخو کې معلومات تر لاسه کړل، د پاکستان هېواد له مختلفو پوهنتونونو او علمي مرکزونو څخه مو لیدنه وکړه، خپلې تجروبې مو ورسره شریکې کړې او د هغوی له تجروبو مو ګټه واخیسته.
د یادونې وړ ده چې په دغه ۲۵ ورځني علمي سفر کې د هېواد مختلفو تحصیلي بنسټونو ۳۸ تنه استادان شامل وو.
