د ابوعلي ابن سینا کابل طبي علومو پوهنتون د اکسیجن د تولید د دستګاه په جوړولو سره اړمنو ناروغانو لپاره د هیلو سرچینه وګرځېده
د ابوعلي ابن سینا کابل طبي علومو پوهنتون کمیونیټي کالج آمریت او د ټکنالوژۍ او طبي وسایلو د بیاجوړولو تخنیکي ټیم وتوانېد چې د اکسیجن د تولید دستګاه جوړه کړي او حاضر دي چې دغه دستګاه د بازار په پرتله په نیمایي بیه وپلوري.
د لوړو زده کړو وزارت علمي معین پوهنمل عبدالتواب بالاکرزي د اکسیجن د تولید له هغه دستګاه چې د ابوعلي ابن سینا د کابل طبي علومو پوهنتون د کمیونیټي کالج آمریت او د ټکنالوژۍ او طبي تجهیزاتو د بیاجوړولو تخنیکي ټیم جوړه کړې، لیدنه وکړه او د هغوی نوښت یې وستایه او ویې ویل، په داسې حال کې چې اکسیجن ته اړتیا محسوسېږي دا ګام د وطن سره مینه او د ولس په وړاندې د مسولیت احساس دی. پوهنمل عبدالتواب بالاکرزي زیاته کړه چې د لوړو زده کړو وزارت چمتو دی چې د ابوعلي ابن سینا د کابل طبي علومو پوهنتون په ملاتړ سره د دې دستګاه په تولید او تکثیر کې د نورو دولتي روغتونونو د په وخت خدمتونو د وړاندې کولو جوګه شي او د عامې روغتیا وزارت او خصوصي روغتونونو په مرسته به د دې دستګاه تولید ته پراختیا ورکړي.
د کمیونیټي کالج او د ټکنالوژۍ او طبي تجهیزاتو د بیاجوړولو آمرې پوهنمل پشتنه بنايي احمدزۍ په وینا دا دستګاه په یوه دقیقه کې ۱۵ لیټره اکسیجن چاڼ او تولیدوي چې د جوړولو توکي یې له زؤلیت Zeolite پرته چې له ایران هېواد څخه پېرل شوي، نور د اړتیا وړ توکي یې د افغانستان له بازاره ترلاسه شوي دي. نوموړې زیاته کړه چې د دغه دستګاه بیه بازار کې سل زره افغانۍ ده خو د ابوعلي ابن سینا کابل طبي علومو پوهنتون د اکسیجن تولیدولو دستګاه باندې ۳۲ زره افغانۍ لګښت راغلی چې له نیمایي څخه په ټيټه بیه پلورل کېږي.
د یادونې وړ ده چې تېر کال د کرونا ویروس لومړۍ څپې په اوج کې ابوعلي ابن سینا کابل طبي علومو پوهنتون Ventilator یا د مصنوعي ساه تولید ماشین تولید کړ چې د کرونا ویروس ناروغانو ته د روغتیايي خدمتونو په وړاندې کولو کې یې حیاتي رول ولوباوه. د دې دستګاوو جوړول په دې بېړنیو شرایطو کې او د روغتونونو اړتیا ته په پام سره یوه مهمه لاسته راوړنه ګڼل کېږي.
