د لوړو زدهکړو سرپرست وزیر شمال زون ته د ولايتي سفرونو په دوام په کندوز ولایت کې ولسي غونډي ته وینا وکړه
په یاده غونډه کې، چي ولايتي مسؤلينو، عالمانو، د پوهنتون استادانو او محصلینو او متنفذینو حضور درلود د لوړو زدهکړو سرپرست وزیر شیخ الحدیث مولوي نداء محمد ندیم صاحب محصلینو ته په خطاب کې وویل، چې موږ داسي اسلامي شخصیتونه تربیه کول غواړو چې د اسلامي ارزښتونو لپاره هر ډول قربانۍ ته چمتو وي او د پردیو له افکارو او ارزښتونو متاثره نه شي؛ بلکې پر خپلو ارزښتونو ثابت پاتي شي. همدارنګه سرپرست وزیر د تبلیغاتي جګړې په اړه خبري وکړې، چې غرب نن ورځ د افغان ښځو د تعليم او تحصيل خبرې کوي، په تېرو شلو کلونو کې یې زموږ پر کورونو بمونه غورځول ښځې، ماشومان او سپین ږیري یې شهيدانول او اوس یې د افغانانو شتمني هم کنګل کړې ده.
همداراز سرپرست وزیر پر خپلو لاسته راوړنو خبرې وکړې، هغه وویل، چې٢٥٠ میلیونه افغانۍ مو د لابراتوارونو د تجهیز او ٤٥٠ میلیونه افغانۍ د استادانو د ظرفیت لوړونې لپاره بیلې کړې دي او د استادانو د دوکتورا برنامو لپاره ١٠٠ بورسونه په نظر کې دي.
وروسته د کندوز پوهنتون رئيس مولوي عبدالهادي همت سرپرست وزیر ته ښه راغلاست ووایه او د یاد پوهنتون پر تاريخچې، تشکیلاتو، لاسته راوړنو او ستونزو يې خبرې وکړې.
