د لوړو زده کړو سرپرست وزیر په شیخ زاید پوهنتون کې یوې سترې غونډې ته د وینا تر څنګ، په دغه پوهنتون کې دوې لویې پروژې پرانیستې
د لوړو زده کړو سرپرست وزیر او ورسره مل پلاوي جنوب ختیځ زون ته د خپل رسمي سفر پر دوام په شیخ زاید پوهنتون کې یوې ستري غونډې ته، چې د خوست ولایت والي مولوي عبدالقیوم روحاني، د شيخ زايد پوهنتون رئيس شيخ الحدیث مولوي محمد نسیم حقاني د خوست جهادي مدرسې مهتمم شیخ الحدیث افضل حسین حسیني د لوړو زده کړو وزارت د محصلانو خدمتونو او همغږۍ رئیس استاد کلیم الله محمدي، د پوهنتون مرستیالانو، د پوهنځیو رئیسانو، د خوست ولایت شیوخو کرامو، استادانو، کارکوونکو او محصلانو ګډون کړی و، خبرې وکړې.
د لوړو زده کړو سرپرست وزیر محترم شیخ الحدیث مولوي نداء محمد ندیم په یاده غونډه کې د ژمي په رخصتیو کې د محصلینو لپاره د سمینارونو او اصلاحي برنامو جوړول یوه ښه فرصت وباله او د محصلینو پر اصلاحي روزنه یې ټینګار وکړ. دغه راز نوموړي زیاته کړه: «همدا محصلین د سبا ورځې مشران او رهبران دي، باید پوه او ځيرک وي.»
نوموړي د انسان د کرامت اړوند د قرانکریم ځينې ایاتونه بیان کړل او ویې ویل چې انساني کرامت په اسلامي نظام سره ساتل کېدلی شي. دغه راز هغه استادانو ته په خطاب کې وویل: «موږ او تاسو د دې نظام خادمان یوو، نو راځئ چې هر یو په خپله برخه کې له زړه خدمت وکړو، په صحیح اسلامي طریقه د دې ملت د بچیانو روزنه وکړو او د علم کیفیت لوړولو کې زیار وباسو.»
همدارنګه د خوست ولایت والي، د شيخ زايد پوهنتون رئیس او نورو ویناوالو په خوست ولایت کې د علم پر پراختیا خبرې وکړې. د دې تر څنګ د لوړو زده کړو سرپرست وزیر د شیخ زاید پوهنتون مشرتابه پلاوي په ملتیا، د ۱۰،۵ میلیونه افغانیو په لګښت له وارداتي برېښنا سره د پوهنتون وصل کولو او د څه باندې ۲۸۰ زره افغانیو په لګښت د پوهنتون عمومي چوک د اوبو فواره او حوض پروژې ګټې اخیستنې ته وسپارلې.
د یادونې وړ ده چې د لوړو زده کړو سرپرست وزیر په یاد سفر کې د شیخ زاید پوهنتون له تدریسي روغتون څخه لیدنه وکړه او د دغه پوهنتون مسؤلینو ته یې د لازمو لارښوونو تر څنګ، د هغوی ستونزې واورېدې او د حل ډاډ یې ورکړ.
نېټه: چهارشنبه
۱۴۴۶ هـ.ق، د شعبان ۱۳مه
۱۴۰۳ هـ.ش، د سلواغې ۲۴مه
۲۰۲۵ م، د فبروري ۱۲مه
