د کابل طبي علومو پوهنتون طب پوهنځي څخه ۱۱۰ تنه ډاکټران فارغ او ټولنې ته د خدمت په موخه وړاندې شول
په کابل طبي علومو پوهنتون کې په همدې مناسبت جوړې شوې فراغتغونډه کې د لوړو زده کړو او عامې روغتیا سرپرست وزیرانو، د لوړو زده کړو وزارت د محصلانو چارو معین، د کابل طبي علومو پوهنتون رهبري پلاوي، استادانو، فارغ شویو محصلینو او د هغوی د کورنۍ غړو ګډون کړی و.
په یاده فراغتغونډه کې د لوړو زده کړو سرپرست وزیر محترم شیخ الحدیث مولوي نداء محمد ندیم وویل چې لوړو زده کړو وزارت مکلف دی چې متعهد او متخصص کادرونه وروزي او ټولنې ته یې د خدمت لپاره وړاندې کړي.
محترم شیخ صاحب فارغ شویو ډاکټرانو ته په خطاب کې وویل: «ستاسو ډاکټري به هلته کامیابه او په دنیا او اخرت کې سرلوړي وي، چې خپل هېواد او خلکو ته په اخلاص خدمت وکړئ.»
محترم شیخ الحدیث مولوي نداء محمد ندیم وویل چې زموږ ټولنه متخصصو ډاکټرانو ته ډېره اړتیا لري او فارغ ډاکټرانو ته یې ډاډ ورکړ، چې له اړوندو ادارو سره په همغږۍ به ورته د خدمت زمینه برابروي.
همدا راز د عامې روغتیا سرپرست وزیر مولوي نور جلال جلالي وویل چې دغه وزارت په ۷۵ سلنه ولسوالیو کې روغتونونه جوړوي، چې په دې روغتونونو کې متخصصو ډاکټرانو ته اړتیا ده او زیاته یې کړه: «له نېکه مرغه چې نن داسې تکړه ډاکټران فارغ او د خدمت ډګر ته وړاندې کېږي.»
دغه راز د کابل طبي علومو پوهنتون رییس مفتي احسان الله ابوالفیضان د فارغ شویو ډاکټرانو له کورنیو مننه وکړه چې له خپلو اولادونو سره یې زیار اېستلی دی.
د غونډې په پای کې فارغو ډاکټرانو ته د مسوولینو له لوري تصدیق پاڼې ووېشل شوې.
نېټه: یکشنبه
۱۴۴۶ هـ.ق د ذوالقعدې ۱۳ مه
۱۴۰۴ هـ.ش د ثور ۲۱ مه
۲۰۲۵ م د مې ۱۱
