مالي او اداري معین د ملکي هوایي چلند انسټیټیوټ د ٧٧ محصلانو د فراغت په مراسمو کې ګډون وکړ
د لوړو زده کړو وزارت مالي او اداري معین الحاج مولوي حافظ محمد حامد حسیب د ټرانسپورټ او هوايي چلند وزارت، ملکي هوايي چلند انسټیټیوټ د محصلانو د فراغت په مراسمو کې ګډون او وینا وکړه.
د لوړو زده کړو وزارت مالي او اداري معین د ټرانسپورټ او هوايي چلند وزارت مشرتابه، فارغو محصلینو او د هغوی کورنیو ته د فراغت مبارکي وویله، د علم، اخلاص، هېواد او ملت د خدمت اهمیت په اړه یې خبرې وکړې، محصلان یې لا نورو لوړو زده کړو ته وهڅول او له هغوی یې وغوښتل چې یوازې له دې انسټیټیوټ څخه په فراغت بسنه ونه کړي او د نورو لوړو زده کړو لپاره کوټلي ګامونه پورته کړي.
هغه فارغو محصلانو ته په خطاب کې وویل چې ستاسو د علم د حاصلولو موخه باید خاص د الله تعالی رضا او د اسلامي نظام او خپلو خلکو خدمت کول وي.
د یادونې وړ ده چې د ټرانسپورټ او ملکي هوایي چلند وزارت د ملکي هوایي چلند انسټیټیوټ هر کال د دې انسټیټیوټ په مختلفو څانګو کې د کانکور ازموینې له لارې محصلان جذبوي او د دوه کلنو زده کړو له بشپړولو وروسته یې په هوایي او سړکونو ټرانسپورټ په برخو کې ټولنې ته وړاندې کوي.
نېټه: یکشنبه
۱۴۴۶ هـ.ق د شعبان المعظم ۱۷ مه
۱۴۰۳ هـ.ش د سلواغې ۲۸ مه
۲۰۲۵ م د فبروري ۱۶ مه
