د لوړو زده کړو سرپرست وزیر د کابل طبي علومو پوهنتون د علمي شورا په ناسته کې د ګډون ترڅنګ، د دې پوهنتون مېلمستون هم پرانیست
د لوړو زده کړو سرپرست وزیر محترم شیخ الحدیث مولوي نداء محمد ندیم صاحب د کابل طبي علومو پوهنتون (ابو علي ابن سینا) د مسؤولینو او استادانو د نظرونو، غوښتنو او ستونزو اورېدو په موخه د دې پوهنتون علمي شورا ناسته کې ګډون وکړ او د یاد پوهنتون د مېلمستون پرانیسته یې هم وکړه.
په یاده ناسته کې د لوړو زده کړو سرپرست وزیر، د محصلینو او ټولنې پر وړاندې د مسوولینو او استادانو مسوولیتونو ته په اشارې سره وویل، چې د لوړو زده کړو وزارت هر هغه نظر او وړاندیز ته لبیک وایي، چې د هېواد د تحصیلي سیسټم پیاوړتیا او پرمختګ ته زمینه برابروي.
هغه زیاته کړه چې د افغانستان اسلامي امارت اوس په هره برخه کې د پرمختګ او پراختیا لپاره زمینه برابره کړې ده او له دې فرصت څخه باید په بشپړه توګه ګټه پورته شي.
محترم شیخ صاحب استادانو ته په خطاب کې وویل: « د هېواد د تحصیلي نظام د پرمختګ او پیاوړتیا اساسي مسوولیت ستاسو استادانو پر غاړه دی او په دې برخه کې ا.ا.ا له تاسو څخه هر اړخیز ملاتړ کوي».
د لوړو زده کړو سرپرست وزیر همدارنګه د مسوولیتونو او د اسلامي نظام د امیر د اطاعت په اړه خبرې وکړې او ویې ویل، چې هر څوک د امیر د استازي په توګه په خپلو اړوندو برخو کې ځانګړي مسوولیتونه لري؛ زما غوښتنه له تاسو څخه دا ده چې د تحصیلي نظام، په ځانګړي ډول د طبابت سکتور د پیاوړتیا او پراختیا لپاره خپل رول په ښه توګه ترسره کړئ.
وروسته د کابل طبي علومو پوهنتون رییس شيخ الحديث مفتي احسان الله ابوالفيضان او د علمي شورا غړو په یاده شورا کې د لوړو زده کړو محترم سرپرست وزیر له حضور او ګډون څخه مننه وکړه او د دې پوهنتون د لا پیاوړتیا په موخه یې له نوموړي څخه د لا زیاتې پاملرنې غوښتنه وکړه، چې په دې اړه د محترم سرپرست وزیر له لوري ډاډ ورکړل شو.
د یادونې وړ ده چې د لوړو زده کړو سرپرست وزیر د کابل طبي علومو پوهنتون مېلمستون، چې د کورنیو او بهرنیو مېلمنو د هر کلي لپاره چمتو شوی، پرانیست.
نېټه: سه شنبه
۱۴۴۶ هـ.ق د ذوالحجه ۶ مه
۱۴۰۴ هـ.ش د غبرګولي۱۳ مه
۲۰۲۵ م د جون ۳ مه
