د لوړو زده کړو او اقتصاد وزارتونو او د هندوستان هیواد د سفارت تر منځ د ۱.۷ میلیونو ډالرو په ارزښت د دوو پروژو قرارداد امضاء شو
د لوړو زده کړو او اقتصاد وزارتونو او په کابل کې د دوست هیواد هندوستان سفارت تر منځ د ۱.۷ میلیونو ډالرو په ارزښت د دوو پروژو قرارداد چې د هندوستان له لورې تمویلیږي، امضاء شو.
د لوړو زده کړو سرپرست وزیر او علمي مرستیال پوهنمل عبدالتواب بالاکرزي په هغې خبرې ناسته کې چې نن ورځ د حکومت د رسنیو په مرکز کې جوړه شوې وه، د افغانستان د تحصیلي بنسټونو د ظرفیت لوړولو له امله د هندوستان هیواد له مرستو څخه مننه وکړه؛ دغه مرستې یې د هیواد د لوړو زده کړو سکتور د پراختیایې پروژو په تطبیق کې موثرې وبللې.
هغه وویل: دغه پروژې چې د فراه لوړو زده کړو موسسې د تدریسې تعمیر او د کاپیسا ولایت د البیروني پوهنتون دننه سرکونو جوړولو ته شاملې دي؛ د دوست هیواد هندوستان ۲۹ ساختماني پروژې دي چې سربېره پر دې لوړو زده کړو وزارت ته ځانګړې شوې دې.
د لوړو زده کړو سرپرست وزیر په وینا دا مهال په هیواد کې د لوړو زده کړو ۲۹ دولتي بنسټونه فعالیت لري او دغه بنسټونه یو لړ انکشافي او پراختیایې پروګرامونه ایجابوي چې ددغو پروګرامونو تطبیق د هیواد ستونزو ته په کتو سره د مرسته کوونکو هیوادونو له مرستو څخه پرته بله چاره نلري.
په دغه خبرې ناسته کې د اقتصاد وزیر مصطفی مستور د هغو پروژو په هکله چې د هندوستان هیواد له لورې په افغانستان کې تمویل شوي دې هر اړخیز معلومات وړاندې کړل.
همدارنګه کابل میشت د هندوستان سفیر ویني کُمار؛ د افغانستان له خلکو او دولت سره ددغه هیواد د مرستو په دوام ټینګار وکړ او ویې ویل چې متبوع هیواد به يې له هغو پروژو څخه ملاتړ وکړي چې د افغانستان د عادي خلکو په ژوند مستقیم تاثیرات ولري.
د یادونې وړ ده چې تر دې مهاله له ټولو ۲۹ پروژو څخه چې په مجموعي ارزښت له ۱۴ میلیونه ډالرو زیات په دریو مرحلو کې د هندوستان هیواد له ۱۲۰ میلیونه ډالري مرستو څخه چې لوړو زده کړو وزارت ته ځانګړي شوې دې؛ ۱۷ پروژې یې بشپړې، ۱۰ پروژو باندې کار جریان لري، یوه پروژه د تدارکاتو په پروسس کې، یوه پروژه فسخ او دوه پروژې نژدې د ۱.۷ میلیونه ډالرو په ارزښت نوې منظورې شوې دي.
