کابل پوهنتون کې د اسلامي شبکه کارۍ او معرق کارۍ نندارتون پرانيستل شو
د کابل پوهنتون ښکلو هنرونو پوهنځي کې د اسلامي شبکه کارۍ او معرق کارۍ نندارتون پرانيستل شو.
په دغه نندارتون کې په اسلامي هنر او ارزښتونو شبکه کاري او معرق کاري شوي ۴۱ هنري اثرونه چې ددغه پوهنځي د استادانو او محصلانو په لخوا چمتو شوي وو، په کابل پوهنتون کې نندارې ته کېښودل شول.
د لوړو زده کړو سرپرست وزير او علمي معین پوهنمل عبدالتواب بالاکرزي، د ښکلو هنرونو پوهنځي له رئیس، استادانو او محصلانو او له پیمان پروډکشن څخه ددغه نندارتون د جوړولو له امله د مننې په ترڅ کې وویل چې هنر د ټولنې په تیره بیا د اسلامي ټولنې له اساسي اړتیاوو څخه ګڼل کیږي چې له نیکمرغه د کابل پوهنتون د ښکلو هنرونو پوهنځي په دې لاره کې زیاتې هڅې کړي تر څو هنري او اسلامي ارزښتونه د پخوا په پرتله لا ډېر په عامه ذهنونو کې بنسټیز کړي.
د لوړو زده کړو سرپرست وزیر ددغه نندارتون د محصلانو کړنې او فعالیتونه وستايل او ويې ویل چې لوړو زده کړو وزارت ددغه پوهنځي له لاسته راوړنو څخه په کلکه ملاتړ کوي او همدارنګه له یاد پوهنځي سره په مختلفو برخو کې نږدې همکاري ته چمتو دی.
د کابل پوهنتون رئیس پوهاند محمد عثمان بابري د اسلامي شبکه کاري او معرق کاري په برخه کې د ښکلو هنرونو پوهنځي فعالیتونه وستايل او ویې ويل چې هنر باید د ټولنې د اړتياوو سره سم دود ومومي او پر همدې اساس باید د اسلام او هنر تر منځ امتزاج وشي تر څو د اسلامي افراطیزم او ماډرنیزم تر منځ یو جوړښت را منځته شي.
د اطلاعاتو او فرهنګ وزارت مالي او اداري معينې سعیده مژګان مصطفوي د کابل پوهنتون د ښکلو هنرونو پوهنځي څخه د اطلاعاتو او فرهنګ وزارت د لا زیات ملاتړ او همکاري د اعلانولو تر څنګ له هیوادوالو وغوښتل چې په خپلې آبادۍ او کور جوړونې کې د اسلامي هنرونو ځانګرتیاوې او ظرافتونه په نظر کې ونیسي.
د غونډې په پای کې د لوړو زده کړو سرپرست وزیر، د کابل پوهنتون رئیس او په لوړو زده کړو چارو کې د جمهور رئيس سلاکار، د اطلاعاتو او فرهنګ وزارت او هغو محصلانو ته چې په یاد نندارتون کې یې بهترین آثار نندارې ته وړاندې کړل، د ښکلو هنرونو پوهنځي له لورې چمتو شوي ستاينليکونه ډالۍ کړل.
