د لوړو زده کړو وزارت مالي او اداري معین د افغانستان د کرنيزو علومو او ټيکنالوژۍ پوهنتون ستونزې واوریدې
د لوړو زده کړو وزارت مالي او اداري معین نوراحمد درویش د افغانستان د کرنیزو علومو او ټیکنالوژۍ ملي پوهنتون ستونزې د ويډیو کنفرانس له لارې واورېدې او د هغو د حل لپاره یې لازمې لارښوونې وکړې.
په دغه ویډیو کنفرانس کې د کرنیزو علومو او ټیکنالوژۍ ملي پوهنتون علمي معاون پوهنمل احمد فواد احساس، د دغه پوهنتون د لیلیې، درسي صنفونو او د محصلانو د بدل اعاشې د ستونزو په اړه خبرې وکړې.
وروسته د لوړو زده کړو وزارت مالي او اداري معین نوراحمد درویش په داسې حال کې چې ددغه وزارت د مرکزي ادارو رئیسانو هم حضور درلود، په دغه پوهنتون کې له کرونا وایرس څخه وروسته رامنځته شوي ستونزې، ننګونې او فُرصتونه واوریدل، پوهنتونو ته د بودجې د تشخیص د شرایطو د توضیح په وړاندې کولو سره یې وویل، چې ټول پوهنتونونه باید د بودجې د ترلاسه کولو لپاره خپل عملیاتي پروګرامونه د اداري او څیړنیزو جوړښتونو د اړتیاوو، د علمي پروګرامونو د موخو، او د زیربنا د پراختیایي استراتیژۍ سره سم طرحه او تطبیق کړي.
د لوړو زده کړو وزارت مالي او اداري معین ټینګار وکړ چې له دې وروسته هیڅ پوهنتون ته د تخمین او اټکل له مخې بودجه نه ورکول کیږي، د پوهنتونو مالي او اداري څانګې مکلفې دې چې په یوې عملیاتې طرحې سره خپلې ټولې علمي، جوړښتي او اداري اړتیاوې وړاندېز کړي او د هغو مطابق بودجه تر لاسه کړي.
د لوړو زده کړو وزارت مالي او اداري معین نوراحمد درویش د افغانستان د کرنیزو علومو او ټیکنالوژۍ ملي پوهنتون ته ډاډ ورکړ چې د لیلیې او بدل اعاشې اړوندو موجودو ستونزو د حل لپاره به اقدام وکړي او د اوږد مهاله ستونزو د حل لپاره به د لوړو زده کړو وزارت د مالي او اداري اصولو مطابق هڅې وکړي.
د افغانستان د کرنیزو علومو او ټیکنالوژۍ ملي پوهنتون په کندهار ولایت کې موقعیت لري او د هیواد له مهمو پوهنتونو څخه دی، چې د ۸۰۰ محصلانو او ۳۵ استادانو په لرلو سره د کرنیزې ټیکنالوژۍ په برخه کې د هیواد په کچه د تدریس پروسه او علمي څیړنه تر سره کوي.
