د لوړو زده کړو وزارت د ژمنو د پلي کولو په موخه د راپور ورکولو غونډه
د لوړو زده کړو وزارت د ژمنو د پلي کولو په موخه د راپور ورکولو غونډه چې د افغانستان د پرانيستې حکومتولۍ د دويم پروګرام (OGP) له پاره وه، نن د اداري او مالي معين په رياست سره جوړه شوه.
د لوړو زده کړو علمي معين نور احمد دروېش وویل، د افغانستان د پرانيستې حکومتولۍ د دويم پروګرام پر بنسټ ټاکل شوې ده چې د اکاډميکو څېرو، څېړونکو، د مدني ټولنې غړو، نړيوالو متخصصينو او د عامه او خصوصي سکتور استازو په ګډون به د هېواد د کار له بازار سره سم د ۳۰ تحصيلي نصابونو بيا کتنه د ۲۰۲۱م کال د جون تر پايه بشپړه شي.
د نوموړي په وينا له يادو ۳۰ نصابونو څخه تر اوسه پورې ۶ بشپړ شوي دي او پر ۱۴ نورو کار روان دی.
اداري او مالي معين همدا راز د يادو ژمنو د پلي کولو په موخه د اړوندو ادارو پر اړيکو او ډېرې همکارۍ ټينګار وکړ او د کاري بهير د چټکتيا په اړه يې لازمې لارښوونې ورته وکړې.
د پرانيستې دولتدارۍ د مشارکت سازمان (OGP) يو نړيوال سازمان دی چې د ښاريانو د مدني ګډون او د پرانيستې حکومتولۍ په پياوړتيا او د حکومت د کړنو د لوړتيا په برخه کې ځواب ويونکی او اغېز ښندونکی فعاليت وکړي. افغانستان هم د دې سازمان غړيتوب اخيستی او د روڼتيا د فرهنګ د ترويج، د اداري فساد پر وړاندې مبارزه او د حکومت په پروسه کې د خلکو ګډون او يا هم په هېواد کې د نوې تکنالوژي په کارولو سره کار کوي.
