د بدخشان پوهنتون حقوقو او شرعیاتو پوهنځي سلو تنو زدکړیالانو د حقوقي کلینیک د زده کړو پروګرام ته لار ومونده
دا د حقوقي کلینیک د زده کړو پروګرام اوومه پړاو دی، چې په بدخشان پوهنتون کې تر سره کېږي.
په دغه شپږ میاشتني روزنیز پروګرام کې زدکړیالان په عملي بڼه عدلي او قضایي مهارتونه زده کوي.
د بدخشان پوهنتون حقوقي کلینیک په ۲۰۱۵ کال کې د GIZ دفتر د قانون حاکمیت څانګې په مالي او تخنیکي ملاتړ جوړ شو او په ۲۰۱۷ کال کې یې له عدلیې وزارت څخه جواز تر لاسه کړ.
تر دې مهاله د بدخشان پوهنتون شرعیاتو او حقوقو پوهنځیو سلګونه زدکړیالان د حقوقي کلینیک له ګټور پروګرام څخه برخمن شوي او په بېلابېلو دولتي او نادولتي بنسټونو کې یې دندې موندلي دي.
په حقوقي کلینیک روزنیز پروګرام کې د زدکړیالانو اوومې دورې شاملېدو پر مهال د بدخشان پوهنتون مشر پوهندوی محمد قاسم اریا، د GIZ دفتر د قانون د حاکمیت برخې مشر احمد ضیا رحماني، د شرعیاتو پوهنځي مشر پوهنمل صنعت الله جویا او د حقوقو پوهنځي استاد پوهنیار صراط الله دهنوي د حقوقي کلینیک په ارزښت ویناوې وکړې او ژمنه یې وکړه چې په دغه مرکز کې د حقوقو او شرعیاتو پوهنځي زدکړیالانو لپاره د عملي زده کړو لپاره لار هواره کړي.
