د لوړو زده کړو وزارت سرپرست د هېواد د پرمختک په موخه له استادانو څخه هر ارخیزې طرحې وغوښتې
د لوړو زده کړو وزارت سرپرست د کابل پوهنتون مشرتابه شورا له غړو سره په ناسته کې د دغه پوهنتون له استادانو وغوښتل، څو د هېواد علمي، تحصیلي، اقتصادي او ټولنیزو ستونزو د له منځه وړلو لپاره خپلې طرحې وړاندې کړي.
په همدې موخه نن د کابل پوهنتون له مشرتابه شورا پلاوي او استادانو سره په لوړو زده کړو وزارت کې مشورتي ناسته وشوه. د لوړو زده کړو وزارت سرپرست شیخ عبدالباقي حقاني غوره ښوونې او روزنې ته په لار هوارولو ټینګار وکړ او د پوهنتونونو له استادانو یې وغوښتل، چې له خپلو تجروبو په ګټه اخیستنې، د هېواد تحصیلي او اقتصادي نظام د غوړولو او د هېواد سالمې ادارې لپاره جدي کار وکړي.
د لوړو زده کړو وزارت سرپرست زیاته کړه، چې کابل پوهنتون د هېواد د لوی پوهنتون په توګه، اوسنیو شرایطو او د هېواد ګټو ته په کتو، د علمي، تحصیلي، اقتصادي او ټولنیزو ستونزو د حل لپاره طرحې او مشخص پلانونه جوړ کړي، چې په راتلونکي کې په نورو پوهنتونونو کې هم د پلي کېدو وړ وي. شیخ حقاني وویل؛ اوس د دې اړتیا ده چې سالم تحصیلي نظام ولرو او د هېواد په داخل کې د ځوانانو د استعدادونو د پراختیا لپاره لار هواره شي.
شیخ حقاني د خپلو خبرو په دوام کې زیاته کړه، چې د ځوانانو استعدادونو ته په کتو، که چېرې د دغو ځوانانو د علمي پرمختګ هڅه وشي، نو په نیږدې راتلونکي کې به د بهرنیو هېوادونو له احتیاج څخه راووځو.
هغه د هېواد استادان او پوهان معنوي پانګه او د هېواد د پرمختګ اساس وبلل او ډاډ یې ورکړ، چې د افغانستان اسلامي امارت د هغوی نظرونو او طرحو ته درناوی کوي او د اسلام مبین دین په چوکاټ کې به یې عملي کړي. دغه راز د هغوی له توانایانو په استفادې به د افغانستان ځورېدلي خلک د یوې پرمختللې او روښانه ټولنې په لور بوځي.
همدارنګه شیخ الحدیث مولوي شاه محمد د جهاد د لاسته راوړنو په اړه خبرې وکړې، زیاته یې کړه چې ټول باید د مختلفو برخو د سالم مدیریت لپاره هڅه وکړو، څو د پرمختګ د لارې خنډونه لیرې او د پرمختګ او ځان بساینې لوړو پوړیو ته ورسیږو.
د کابل پوهنتون سرپرست محمد اشرف غیرت د لوړو زده کړو وزارت له سرپرست سره د ناستې موخه، د ښې راتلونکې او د غوره تحصيلي فضا د رامنځ ته کولو لپاره، د لوړو زده کړو د کورنۍ علمي تجروبو شریکول وبلل، هغه ډاډ ورکړ، چې ټول استادان د اسلامي امارت تر څنګ ولاړ دي او د لوړو زده کړو وزارت د پروګرامونو د پلي کولو هڅه کوي.
د کابل پوهنتون د مشرتابه شورا په استازیتوب محمد اسماعیل ناصري وویل، چې د دغه پوهنتون په مختلفو برخو کې شورا شته او لویو علمي او تحصیلي موخو ته د رسېدو او همدارنګه روښانه راتلونکي لپاره به له لوړو زده کړو وزارت سره خپلې طرحې شریکې کړي.
دغه ناسته د هېواد د فلاح او خیر لپاره په دعا سره پای ته ورسېده.
