د لوړو زده کړو عالي شورا ناسته، نن د لوړو زده کړو سرپرست وزیر په مشرۍ تر سره شوه
۱۴۰۰کال، د لړم ۶مه، لوړو زده کړو وزارت
د لوړو زده کړو عالي شورا ناسته، نن د لوړو زده کړو سرپرست وزیر په مشرۍ تر سره شوه.
د ناستې په پیل کې د لوړو زده کړو سرپرست، د لوړو زده کړو تحصیلي بنسټونو د ستونزو په برخه کې د دغه وزارت پر پروګرامونه رڼا واچوه او ویې ویل چې لوړو زده کړو وزارت په دې هڅه کې دی، چې د هېواد د پوهنتونونو اړتیاوې پوره او ستونزې یې، شته امکاناتو ته په کتو ژر تر ژره حل کړي.
هغه وویل: «زموږ موخه د هېواد د تحصیلي بنسټونو پراختیا، ځواکمنتیا او د دغه هېواد د ځوان نسل لپاره د مناسبو تحصیلي زمینو برابرول دي. ځکه یوازینۍ برخه چې هېواد د پراختیا، پرمختګ او ځان بساینې پر لور بېولی شي، هغه باکیفیته لوړې زده کړې او د ځوانو او لایقو کادرونو روزنه ده.»
وروسته له اجنډا سره سم د نویو څانګو د ایجاد په اړه، چې د تحصیلي بنسټونو له لوري یې وړاندیز شوی و، بحث وشو، چې په پایله کې:
ـ ۱۸ د ماسټري پروګرامونه (۱۵ په دولتي بنسټونو او ۳ په خصوصي تحصیلي بنسټونو کې)
ـ ۵ نوې پوهنځي (۴ په دولتي بنسټونو او ۱ په خصوصي کې)
همدارنګه په دولتي پوهنتونونو کې د ۱۵ ډېپارټمنټونه ایجاد او فوق لېسانس پروګرامونو د عوایدو او لګښتونو واحد طرزالعمل په اکثریت رایو تایید شو.
د یادولو ده، چې د وزارت د مقام په سپارښتنه به د لوړو زده کړو عالي شورا ناسته، د هېواد د تحصیلي بنسټونو د ستونزو د ژر تر ژره حل په موخه له دې وروسته په منظم ډول تر سره کېږي.
