د لوړو زده کړو وزارت له لوري د امریکايي اشغال د خاتمې او کابل فتحې دویمه کلیزه په شانداره مراسمو سره ولمانځل شوه.
په یادو مراسمو کې، چې په کابل پوهنتون کې جوړ شوي وو، د لوړو زده کړو وزارت مشرتابه پلاوي، د مرکزي پوهنتونونو رئیس صاحبانو، استادانو او محصلینو ګډون پکې کړی و.
په دغه غونډه کې د لوړو زده کړو سرپرست وزیر شیخ الحدیث مولوي نداء محمد ندیم صاحب د اسلامي امارت مشرانو، افغان ولس، د نړۍ مسلمانانو او په ځانګړي ډول د ا.ا.ا مجاهدینو ته د یادې فتحې مبارکي وویله او دا یې د الله تعالی له لوري لوی نصرت یاد کړ.
نوموړي زیاته کړه: «الله سبحانه وتعالی تل له مسلمانانو سره د نصرت وعده کړې او کله چې مسلمانان په خپل مسیر روان شوي، الله تعالی یې بریا په نصیب کړې، چې له موږ سره هم الله تعالی خپله وعده پوره کړه او افغان مسلمان او مجاهد ولس یې له شل کلن اشغال څخه خلاص کړ.»
د لوړو زده کړو سرپرست وزیر وویل چې د ننۍ غونډې موخه د افغانستان اوسنۍ ازادۍ شکر اداکول او راتلونکو مسؤلیتونو ته متوجه کېدل دي. دغه راز هغه له استادانو او محصلینو څخه وغوښتل چې د خپل هېواد او دین د خدمت لپاره ملا وتړي او ځانونه د اسلام او اسلامي امارت له اصولو سره عیار کړي.
همدارنګه د لوړو زده کړو وزارت علمي معین دوکتور لطف الله خیرخواه وویل چې غربي نړۍ زموږ هېواد ته له خپل ټول توان، مال، پوهې او ستراتیژیو سره راغلې وه، خو افغان مجاهدین وتوانېدل چې په کمو امکاناتو هغوی ته ماتې ورکړي.
نوموړي زیاته کړه چې غربي اشغالګرو د اشغال پر مهال زموږ د ځوانانو ذهنونونه په بې ځایه مسایلو بوخت کړي وو، له خپل تاریخ او ثقافت څخه یې لرې ساتلي وو او د هغوی تر منځ یې بې اتفاقۍ اچولې وې.
دغه راز د لوړو زده کړو وزارت د محصلانو معین مفتي محمد طاهر احمد وویل چې اوسمهال په ټوله دنیا کې د واقعي مسلمان تمه یوازې اسلامي امارت ته ده، ځکه چې دا یو واقعي اسلامي نظام دی. نوموړي استادانو او محصلانو ته په خطاب کې وویل: «دا ازادي په ډېرو قربانیو لاس ته راغلې، موږ هغه وخت دا ازادي ساتلی شو، چې د علم په ډګر کې هم پرمختګ وکړو.»
وروسته د مرکزي پوهنتونونو څو تنو استادانو د ازادۍ پر ارزښت او ستایلو خبرې وکړې او د ا.ا.ا له نظام او پالیسیو څخه یې ملاتړ وکړ.
د یادولو وړ ده چې په دغو مراسمو کې د شل کلن جهاد اړوند حماسي شعرونه او ترانې، تمثیلي ټوټې او مستند فلمونه وړاندې شول.
غونډه امنیتي ځواکونو ته د لوړو زده کړو وزارت رهبرۍ، استادانو او محصلینو له لوري د ګلانو په ورکولو سره پای ته ورسېده.
