په کابل پولي تخنیک پوهنتون کې د علمي پروګرامونو په اړه د علمي سروې او نظر شریکونې سیمینار جوړ شو.
په یاد ورکشاپ کې د کابل پولي تخنیک پوهنتون مشرتابه پلاوي، د لوړو زده کړو وزارت علمي معین، د سکتوري وزارتونو استازو او استادانو ګډون کړی و.
د لوړو زده کړو وزارت علمي معین دوکتور لطف الله خیرخواه وویل چې د سکتوري وزارتونو سره د اړیکو ټینګول او د هېواد د پرمختګ لپاره د علمي پروګرامونو په جوړولو کې له نویو طرحو او نوښتونو څخه ګټه اخیستل اړین دي.
نوموړي د کابل پولي تخنیک پوهنتون دغه کار بې ساری ګام او لویه لاسته راوړنه وبلله او د پوهنتون مسؤلینو ته یې په دې برخه کې د هر ډول همکاریو ډاډ ورکړ.
همدا راز د سکتوري وزارتونو په استازیتوب د اوبو او انرژۍ وزارت د اوبو چارو د تنظیم رئیس انجنیر محمد نعمان نثار د سکتوري ادارو او تخنیکي پوهنتونونو تر منځ پر ګډو همکاریو د ټینګار تر څنګ، وویل چې د محصلینو درسي مواد او لابراتوارونه باید تجهیز او معیاري شي.
په پای کې د سیمینار ګډونوال د نظر اخیستلو په موخه په اتو کاري ګروپونو ووېشل شول او په ازاد او شفاف ډول یې په فورمونو کې خپلې تبصرې او نظرونه شریک کړل.
