د لوړو زده کړو سرپرست وزیر شیخ الحدیث مولوي نداء محمد ندیم صاحب په خپل کاري دفتر کې د پاکستان له سفیر عبیدالرحمن نظاماني سره وکتل.
په دغه لیدنه کې د لوړو زده کړو سرپرست وزیر د دواړو هېوادونو تر منځ نیږدې اړیکو ته په اشارې سره، د افغانستان او پاکستان تر منځ د اکاډمیکو همکاریو پر پراختیا ټینګار وکړ.
نوموړي د پاکستان له سفیر څخه وغوښتل چې په یاد هېواد کې د افغان محصلینو د وېزو په برخه کې د ستونزو د حل، افغانستان ته د تدریس په موخه، په ځانګړي ډول افغان نړیوال اسلامي پوهنتون ته د پاکستاني استادانو رالېږلو په برخه کې همکاري وکړي او د ځينو نورو موضوعاتو پر سر یې له یو بل سره بحثونه وکړل.
همدارنګه په کابل کې د پاکستان سفیر عبیدالرحمن نظاماني وویل چې د افغانستان لوړو زده کړو وزارت غوښتنې به د خپل هېواد اړوندو ادارو سره شریکې او څاري.
نوموړي زیاته کړه چې په نیږدې راتلونکي کې به د افغانستان لپاره د پاکستان ځانګړی استازی کابل ته راشي او له هغه سره به هم یاد موضوعات شریک کړي. د افغانستان لپاره د پاکستان سفیر ژمنه وکړه چې د یادو موضوعاتو د ښې څارنې په موخه به د افغانستان لپاره د پاکستان ځانګړي استازي سره د لوړو زده کړو سرپرست وزیر د لیدنې زمینه برابره کړي.
