د لوړو زده کړو سرپرست وزیر شیخ الحدیث مولوي نداء محمد ندیم صاحب په خپل کاري دفتر کې د چین له سفیر سره وکتل.
د لوړو زده کړو سرپرست وزیر د چین له سفیر سره په لیدنه کې د صنعت، تجارت او په ځانګړي ډول لوړو زده کړو په برخه کې د چین د مرستو ستاینه وکړه. نوموړي د افغانستان او چین تر منځ د ښو اړیکو اوږدې مخینې ته په اشارې سره په راتلونکې کې هم د چین له جمهوریت سره د ښو اړیکو هیله څرګنده کړه.
دغه راز د لوړو زده کړو سرپرست وزیر د چین له سفیر څخه وغوښتل چې په دغه هېواد کې د افغان محصلینو د وېزو او سکالریشپونو په برخه کې ستونزې حل او افغان محصلینو ته لا زیات سکالرشیپونه ورکړي.
همدارنګه د چین سفیر وانګ یو د لوړو زده کړو سرپرست وزیر وروستي فعالیتونه وستایل او په تحصیلي ډګر کې یې له افغانستان سره د همکاریو ژمنه وکړه.
د یادولو وړ ده چې په دغه لیدنه کې د دواړو اړخونو تر منځ پر ګډو علمي او اکاډمیکو همکاریو او افغان محصلینو ته د لا ډېرو سکالریشپونو پر ورکولو خبرې وشوې.
