د لوړو زده کړو وزارت بشري سرچینو ریاست له لوري د دغه وزارت ۸۶ تنو نویو ګومارل شوو کارکوونکو لپاره د ظرفیت لوړونې ورکشاپ پای ته ورسېد او ګډونوالو تصدیق پاڼې تر لاسه کړې.
د تصدیق پاڼو د وېش په مراسمو کې د لوړو زده کړو وزارت د بشري سرچینو رئیس مفتي عبدالکریم امیري په کاري چارو کې د زده کړو پر ارزښت او د کار کوونکو پر ظرفیت لوړونې خبرې وکړې.
نوموړي د دا ډول ورکشاپونو د جوړولو له امله د روزنې او ظرفیت لوړونې له امریت څخه مننه وکړه او د یاد ورکشاپ له ګډونوالو یې وغوښتل چې په دغه ورکشاپ کې له زده مهارتونو په خپلو ورځنیو چارو کې ګټه واخلي او خپلو نورو همکارانو ته یې ورزده کړي.
وروسته د بشري سرچینو ریاست د روزنې او ظرفیت لوړونې امر عبیدالله مولايي په ورکشاپ کې د تدریس شوو پروګرامونو په اړه معلومات وړاندې کړل او ویې ویل چې په دغه ورکشاپ کې ګډونوالو ته د اداري پروسیجرونو، اداري مراسلاتو، له انټرنېټ څخه سمې ګټې اخیستنې، د دفتر مهارتونو او اداري اسنادو د مهارتونو په برخه کې زده کړې ورکړل شوې.
محفل ګډونوالو ته د تصدیق پاڼو په وېشلو سره پای ته ورسېد.
نېټه: دوشنبه
