د لوړو زده کړو وزارت علمي معین په مشرۍ يو پلاوي د کونړ سيد جمال الدين افغان پوهنتون کې د پنځو نويو ډيپارټمنټونو د ايجاد ترڅنګ د ياد پوهنتون علمي - څېړنیزې مجلې «اند» مخکتنې مراسمو کې هم برخه واخیسته.
په دې تړاو جوړو شوو مراسمو کې د لوړو زده کړو وزارت علمي معین دوکتور لطف الله خیرخواه، په داسې حال که چې د دې وزارت د څېړنې، تاليف او ژباړې رئيس دوکتور حميدالله مزمل، د سید جمال الدین پوهنتون رئيس پوهنمل محب الله محب، د یاد پوهنتون مرستيالانو، استادانو او محصلينو هم ګډون کړی ؤ؛ د نوموړي مجلې په اړه یې خبرې وکړې.
نوموړي وويل: «خوښ يم چې د اسلامي نړۍ ستر فيلسوف علامه سيد جمال الدين افغان رحمه الله علیه په ټاټوبي او د هغه په نوم نومول شوي علمي بنسټ کې؛ د علمي - څېړنيزې مجلې «اند» مخکتنه کوم.»
نوموړي د اند معنی ته په اشارې استادان او محصلين متوجه کړل چې د علم په ترويج او حصول کې د څېړنې برخې ته پوره پام وکړي او خپل فکر په نوښتونو ورټول کړي.
ورپسې د سيد جمال الدين افغاني پوهنتون رئيس پوهنمل محب الله محب، علمي معین او ورسره مل پلاوي ته د ښه راغلاست ترڅنګ د دې علمي بنسټ په لاسته راوړنو او پرمختګونو تفصيلي خبرې وکړې.
له غونډې وروسته د لوړو زده کړو وزارت علمي معین دوکتور لطف الله خیرخواه او مل پلاوي په کرهنې پوهنځي کې د هارټيکلچر ډيپارټمنټ پرانیسته وکړه او همدارنګه د رياضي او فزيک ډيپارټمنټ، د تاریخ او جغرافيې ډيپارټمنټ یې په مستقلو څلور ډيپارټمنټونو ووېشل.
همدارنګه ياد پلاوي د پوهنتون له بېلابېلو برخو؛ کمپيوټر لېب، کتابتون، د کيميا ډيپارټمنټ لابراتوار، کرهنې پوهنځي له څېړنيز فارم، د کمپيوټر ساينس او کرنې پوهنځيو د استادانو او محصلينو له څېړنيزو او عملي پروژو څخه هم ليدنه وکړه.
علمي معين ديادو پروژو په ليدو خوښي وښوده او محصلينو ته يې نغدي ډالۍ ورکړې او هغوی يې لا نورو نوښتونو ته وهڅول.
