لوړو زده کړو وزارت د کابل پولي تخنیک پوهنتون نوښتګر او ورزشکار محصلین د یوه تشویقي پروګرام په ترڅ کې وستایل.
د لوړو زده کړو وزارت د محصلانو چارو د انسجام امریت په نوښت د کابل پولي تخنیک پوهنتون نوښتګرو او ورزشکارو محصلینو لپاره جوړ شوي تشویقي پروګرام کې د دغه وزارت د خصوصي محصلانو چارو رئیس انجنیر سید اسماعیل روحاني وویل: «موږ هڅه کوو چې د نوښتګرو محصلینو نوښتونه پټ پاتې نه شي او د هغوی د نوښتونو د غوړېدو او پرمختګ لپاره زمینه برابره کړو.» نوموړي زیاته کړه چې زموږ هېواد د پرمختګ لپاره په تخنیکي برخو کې لا زیات کار او نوښتونو ته اړتیا لري.
همدارنګه د لوړو زده کړو وزارت د دولتي محصلانو چارو رئیس استاد حامد یعقوبي د اسلامي علماء کرامو او اختراع کوونکو شخصیتونو او اختراعاتو ته په اشارې سره وویل، چې موږ هغه وخت نوښت کولی شو چې له خپل وخت او امکاناتو اعظمي ګټه واخلو.
وروسته د کابل پولي تخنیک پوهنتون یادو محصلینو د لوړو زده کړو وزارت له ملاتړ او تشویق څخه د مننې تر څنګ، خپلې ستونزې او وړاندیزونه د وزارت له مسؤلانو سره شریک کړل.
د پروګرام په پای کې د لوړو زده کړو وزارت له لوري یاد محصلین په ستاینلیکونو او ډالیو ونازول شول.
د یادولو وړ ده چې لوړو زده کړو وزارت د نورو پوهنتونونو نوښتګرو محصلینو لپاره ورته پروګرامونه په پام کې لري.
