لوړو زده کړو وزارت یوه پلاوي د کابل ښوونې او روزنې او ننګرهار پوهنتونونو د ماسټري پروګرامونو د ازموینو په پرانیسته کې ګډون وکړ.
۱۴۰۰کال، د کب ۲۰مه
د لوړو زده کړو وزارت یوه پلاوي د کابل ښوونې او روزنې او ننګرهار پوهنتونونو د ماسټري پروګرامونو د ازموینو په پرانیسته کې ګډون وکړ.
د دغې ازموینې ګډونوالو ته، چې د ازموینو ملي ادارې له لوري اخیستل کېده، د لوړو زده کړو وزارت د خصوصي محصلانو چارو رئیس انجنیر سید اسماعیل روحاني وویل، چې لوړو زده کړو وزارت فوق لېسانس پروګرامونو ته لومړیتوب ورکوي، چې د پخوا په پرتله یې د جذب ظرفیت دوه چنده کړی او د فوق لېسانس پروګرامونو په برخه کې یې د افغان نړیوال پوهنتون په نامه په یوه ځانګړي پوهنتون کار روان کړی دی.
ښاغلي روحاني زیاته کړه چې خصوصي پوهنتونونه هم د ظرفیت او معیارونو په برابرولو سره کولی شي، چې فوق لېسانس پروګرامونه پیل کړي، خو په جدي ډول به د کیفیت څارنه او د جعل مخنیوی کېږي.
د یادولو وړ ده چې د کابل ښوونې او روزنې پوهنتون کې ټول ۶ د ماسټري پروګرامونه دي، چې د اسلامي تعلیماتو برخه یې نوې ده. دغه راز په ننګرهار پوهنتون کې هم ۶ د ماسټري پروګرامونه دي، چې د عربي ژبې او ادبیاتو برخه یې نوې ده.
هېره دې نه وي، چې د ننګرهار پوهنتون د یادو ماسټري پروګرامونو لپاره شاوخوا (۱۵۰۰) داوطلبانو او د کابل ښوونې او روزنې پوهنتون لپاره شاوخوا (۲۱۰۰) کسانو نوملیکنه کړې وه.
