په ننګرهار پوهنتون کې "د اقلیم بدلون نړیوال کنفرانس" چې د داخلي او بهرنیو هېوادونو استادانو په ګډون سره پیل شوی و، پای ته ورسېد.
د یاد کنفرانس د پای په مراسمو کې، چې د ننګرهار ښېوې ولسوالۍ اړوند د ناکامورا پارک کې ترسره شول، د لوړو زده کړو وزارت علمي معین دوکتور لطف الله خیرخواه د دغې نړیوالې موضوع په اړه کنفرانس کې د بهرنیو او کورنیو څېړونکو استادانو او ټولو برخوالو د پراخ ګډون او د ننګرهار ولایتي مسؤلینو څخه د همکاریو له امله مننه وکړه.
نوموړي وویل " د افغانستان د لوړو زده کړو وزارت په تاریخ کې په لومړي ځل دغه ډول نړیوال کنفرانس ترسره شو، پکار ده چې په ملي او نړیواله کچه د داسې سترو موضوعاتو په اړه په جدیت او لیوالتیا سره تعامل وشي."
همدارنګه د بهرنیو هېوادونو څېړونکو او استادانو وویل چې افغانستان تېرو څلورو لسیزو کې له هره اړخه ځپل شوی هېواد دی او زموږ د موندنو او لیدنو په اساس باید له دې ولس سره مرستې وشي.
یادو استادانو دغه راز وویل چې افغانستان د اقلیم په خرابوالي کې هیڅ ډول برخه نه لري او برعکس یې زیانونه ګالي، د هغوی په وینا چې نوره نړۍ باید افغانانو سره په دا ډول بشري موضوعاتو کې سیاسي برخورد ونکړي.
د یادونې وړ ده، چې د دغه درې ورځني نړیوال کنفرانس په وروستۍ ورځ هم (۴۱) څېړنیز پوسټرونه ارایه شول او کنفرانس د تندیسونو، تصدیقونو او ستاینلیکونو په وېشلو سره پای ته ورسېد.
